Афғонистонда “Толибон”нинг ҳокимият тепасига келиши ва ундан кейинги қашшоқлик миллионлаб одамларни Эронга қочишга мажбур қилганди. Эндиликда Эрон ноқонуний муҳожирларини оммавий депортация қилмоқчи.
![](/static/2024/09/12/photo_2024-09-12_20-55-36-Wo13t9--.jpg)
“Мамлакатда ноқонуний қочқинларнинг мавжудлиги нафақат ижтимоий зарар келтиради, балки маҳаллий аҳолининг иш жойларини ҳам тортиб олади”, деди Эрон ички ишлар вазири Искандар Момейни.
Афғонистонликларнинг қўшни Эронга кўчиши 2021 йил август ойида бошланган. БМТнинг Қочқинлар агентлиги ҳисоб-китобига кўра, Эронда 4,5 миллионга яқин афғон муҳожирлари мавжуд. Эрон ОАВга кўра, мамлакатда жами 8 миллион афғон бўлиб, улардан 4 миллиони ноқонуний муҳожирлардир.
Эрон ва “Толибон” ҳукумати билан дипломатик алоқаларга эга, депортация тартиб-қоидалари бўйича икки томонлама келишувлар мавжуд. Маълум қилинишича, 2024 йилнинг дастлабки олти ойида 400 минг Афғонистон фуқароси Эрондан мамлакатга қайтарилган. Бироқ таҳлилчилар депортация қилинган афғонларнинг бир қисми яна Эронга қайтишини башорат қилмоқда.
Оддий эронликларнинг афғон муҳожирларга муносабатини ҳеч ким таҳлил қилмаган. Бироқ Эрон мухолифати расмий Теҳрон вазиятдан муҳожирларга нисбатан нафрат уйғотишда фойдаланмоқда, деган хулосага келган. Миллий қаршилик кенгашига кўра, Эрон расмийлари ўз ватандошларига атайлаб нотўғри маълумот бермоқда. Хусусан, давлат ОАВ қочқинлар томонидан олиб келинган мохов каби турли хил инфекцияларнинг авж олгани ҳақида бир неча бор хабар берган.
“Айни пайтда Теҳрон қочқинлар муаммосидан БМТ инспекторларига ижтимоий сиёсатдаги нотўғри ҳисоб-китоблари учун баҳона сифатида фойдаланмоқда”, деб ёзади мухолифат кенгаши.
Қаршилик ҳаракатига кўра, барча муаммолар миграция масалаларида мувофиқлаштириш ва бошқарувнинг етишмаслигидан келиб чиқмоқда.
Изоҳ (0)