Афғонистоннинг Шибирғон шаҳрида Қўштепа канали лойиҳасининг икки муҳандиси ҳужумга учраши оқибатида ҳалок бўлди. Бу ҳақда манбаларга таяниб, Etilaatroz хабар берди.
Маълум қилинишича, икки муҳандис Сахиобод туманидаги яшаш жойларида номаълум шахслар томонидан ўққа тутилган. Марҳумлар Миллий тараққиёт компанияси ходимлари бўлиб, Қўштепа канали лойиҳасида ишлаган. Манба ҳалок бўлганларнинг шахси ҳақида батафсил маълумот бермаган. Ҳозирча ҳужумнинг мақсади ва ижрочилари аниқ эмас. Жузжондаги “Толибон” хавфсизлик хизмати расмийлари ҳодисага изоҳ бермаган.
Қўштепа “Толибон”нинг йирик лойиҳаси
Қўштепа канали лойиҳаси Амударёнинг сув ресурсларини бошқариш соҳасидаги йирик лойиҳалардан биридир, у ҳозирда Афғонистон шимолида амалга оширилмоқда. “Толибон” каналнинг биринчи босқичи ишга туширилганини айтмоқда, аммо Марказий Осиё давлатлари бу лойиҳадан хавотирда.
The Economist прогнозига кўра, агар канал қуриб битказилса, минтақавий можаронинг кучайишига олиб келиши мумкин. Канал Амударё сувини Ўзбекистон билан чегарага йўналтиради. Афғонистон электр энергиясининг катта қисмини Ўзбекистондан импорт қилиши ҳисобга олинса, “Толибон” қўшни республикага қарши чиқолмайди.
“Иқлим ўзгариши Ўзбекистонни 15 фоиз сув йўқотишига сабаб бўлмоқда, агар канал қурилиши ортидан яна 10 фоиз йўқотса, Ўзбекистон 25 фоиз сув йўқотиши мумкин”, — дейилади яна бир прогнозда.
Ўзбекистон президенти Шавкат Мирзиёев “Толибон” томонидан Қўштепа канали қурилиши Марказий Осиёдаги сув режими ва мувозанатини ўзгартиришини айтганди. “Толибон” эса Ўзбекистон Қўштепа каналидан зарар кўрмаслигига ваъда берган.
Изоҳ (0)