Хонанда Татьяна Зайцева “Яшин TV” YouTube каналига берган интервьюсида бир муддат “Шарқ” гуруҳидан алоҳида ижод қилгани ҳамда дуэтдоши, турмуш ўртоғи Сарвар билан ажрашмоқчи бўлгани ҳақида сўзлаб берди.
— Кетма-кет уч нафар фарзандли бўлдим ва умуман дам олмадим. Ҳар куни тўй, байрам, корпоративларда чиқиш қилавериш мени жуда толиқтирди. Бир муддат дам олишга қарор қилдим. Гуруҳдан кетдим, саёҳат қилдим, тўғри овқатланиш ва спорт ёрдамида вазнимни камайтирдим. Маълум муддат дизайнерлик соҳасида фаолият юритиб, ўз салонимни очдим. Тўй ва оқшом либослари салонига асос солдик. Яккахон ижодимни бошладим. Аслида, “Ўзбегим ёшлари” ансамблида мен яккахон хонанда эдим. Сарвар ака билан ҳам ўша ерда танишганмиз.
Ҳар бир инсон ҳаётида шундай босқич бўлади: сиз кўзлаган мақсадларингизга эришдингиз, ҳамма нарсангиз бор, лекин шунда ҳам нимадир етишмаётгандай туюлади. Дунё ранг-баранг, инсон бир жойда қотиб қолмаслиги керак. Менда ҳам шундай бўлди. Ярим йил ичида бир нечта яккахон ижод намуналаримни чиқардим, кўпчиликка манзур бўлди, дейди Татьяна.
— Мендаги тушкун кайфият уч йил аввал бошланган. Ўшанда ўзимни топа олмаётганимни ҳис этганман. Бу ҳақда Сарвар акага айтганимда роса ҳайрон бўлган. “Сенга нима етмаяпти, ҳамма нарсамиз бор. Ҳар куни одамлар орасидамиз, ҳар куни ҳаётимиз байрам, тўй”, деган. Лекин инсонларга байрам кайфиятини бериш учун сизнинг ўзингизда кайфият юқори бўлиши керак. Менда эса бунинг акси. Сарвар акам бу вазиятда мени тушунганлар. Мен бундан жуда миннатдорман. Чунки ҳамма нарсаси бўла туриб, яна нимадирларни излайдиган аёлни ҳамма ҳам тушуна олмайди.
Яқинда Сарвар ака билан ажрашамиз деб “ЗАГС”га бордик. Икки соат ўша ерда гаплашиб турдик. Кейин мен “Сарвар ака, бугун сиз билан ажраша олмаймиз. Ажрашиш учун тўғри келмайдиган кийимдасиз. Футболкангизни қаранг, жуда кулгили”, дедим. Уларнинг футболкаларида кичкина боланинг расми бор эди. “Сизга қараб жиддий гапира олмаяпман. Футболкангиз ҳамма режани барбод қилди”, дедим. Шундан кейин улар кулиб юбордилар ва биз уйга кетдик. Ҳозир ҳаммаси яхши. “Шарқ” гуруҳи яна қайта тикланди ва биз биргаликда тўйларга чиқяпмиз, дея сўзларини давом эттиради хонанда.
Изоҳ (0)