Голливуд актрисасининг айтишича, сўнгги 10 йил унинг учун чидаб бўлмас даражада кечган. Анжелина Жоли модалар уйи лойиҳаси унга психологик жароҳатни енгишга қандай ёрдам бергани ҳақида айтиб берди.
48 ёшли Жолининг сўзларига кўра, бу муаммодан қутулишига 6 нафар фарзанди бирдек ёрдам берган. Бред Питтнинг собиқ рафиқаси болаларига нафақат она, балки дўст бўлишга ҳам ҳаракат қилишини айтади.
“Она бўлганимда 26 ёшда эдим. Шундан сўнг бутун ҳаётим ўзгарди. Фарзандларим менга бу дунёда бошқача яшашим кераклигини ўргатишди. Ўйлайманки, агар улар бўлмаганида том маънода чўкиб кетган бўлардим. Албатта, мен онаман ва умид қиламанки, улар учун ўрнак бўлишим керак”, — деб тушунтиради Анжелина.
Жоли айнан фарзандлари Аtеlier Jolie модалар уйини яратишда ёрдам берганини тан олади. Актрисанинг сўзларига кўра, бу лойиҳада 18 ёшли қизи Захара ва 19 ёшли Пакс фаол иштирок этган. Голливуд юлдузининг қизи унга Нью-Йорк марказида 1970 йилларда Энди Уорхолга тегишли бўлган икки қаватли бинони танлашга ёрдам беради.
“Мен жуда таъсирчан бўлишим мумкин, аммо Захара жуда мувозанатли, қатъиятли ва ўйлаб иш қилади. У рози бўлгач, иккаламиз бир қарорга келганимизни ҳис қилдим”, — деди “Умрбоқийлар” юлдузи.
Бренд логотипини яратишда Пах иштирок этади. У кириш эшиги тепасига осилган вивескани чизган. “Бу ўғлимнинг меҳнати”, — дейди Жоли.
“Оскар” совриндори ўтмишда модага қизиқмаганини тан олади. Жолининг сўзларига кўра, у либосларини тикувчиларга буюртма қилган ёки дўкондан сотиб олган, лекин ҳеч қачон стилистлар билан ҳамкорлик қилмаган.
“Шкафимда кийим-кечакдан кўра китоблар кўп. Мен модага қараб кийинишни ҳаётининг мазмунига айлантириб олганлардан эмасман”, деб тушунтиради кўп болали она.
Актриса мода саноатига шахснинг ўзини ўзи кўрсатиши нуқтаи назаридан қизиқиб қолади. Жолининг тан олишича, ҳаётидаги бир нечта муаммолар уни катта тренч палтолар фойдасига нафис либосларидан воз кечишга мажбур қилган. Анжелинанинг сўзларига кўра, энди у ўз услубини излаш учун тажриба ўтказишга қизиқмоқда.
“Терапевтим мендан эгнимда бемалол турадиган, тор бўлмаган кийимлар кийиб кўришимни сўради. Бу аҳмоқона туюлди, лекин мен шим ва ботинкани танлаб, “қаттиққўлроқ” образ мени кучлироқ қилади деб ўйладим. Аммо мен юмшоқ бўлиш учун етарлича кучли эдимми? Ўша пайтда, йўқ. Мен ўзимни заиф ҳис қилдим. Ҳозир эса аслида ўз услубимни билиш-билмаслигим менга қизиқроқ. Чунки мен 48 ёшимда ҳам кимлигимни аниқ айтолмайман. Мен, эҳтимол, шахс сифатида ўтиш даврини бошдан кечираётгандирман, — дейди актриса.
“Менимча, бу мен учун ҳам терапия бўлди — сиз ишонадиган одамлар билан ижодий майдонда ишлаш ва ўзимни қайта кашф қилиш. Ҳаётимнинг кўп жиҳатларини ўзгартиришга умид қиламан. Ҳозир эса фақат олдинга ҳаракат қилишим керак”, — деб иқтибос келтиради Британиянинг Vogue журнали.
Изоҳ (0)