Ғазо сектори оммавий қабристонга айлантирилмоқда, деди актриса ва Бирлашган Миллатлар Ташкилотининг собиқ яхши ният элчиси Анжелина Жоли.
“Бу қамалдаги аҳолини атайлаб бомбардимон қилиш, уларнинг қочиб қутуладиган жойи йўқ. Деярли йигирма йилдан буён очиқ осмон остидаги қамоқхона бўлиб келган Ғазо қисқа фурсатда оммавий қабристонга айланмоқда. Ҳалок бўлганларнинг 40 фоизи бегуноҳ болалар. Бутун бошли оилалар ўлдирилмоқда”, — деб ёзди у Instagram саҳифасида.
Актрисанинг сўзларига кўра, миллионлаб фаластинликлар озиқ-овқат, дори-дармон ва гуманитар ёрдамдан маҳрум бўлган ҳолда халқаро ҳуқуқларига зид ҳолда “оммавий жазоланмоқда инсонийликдан маҳрум қилинмоқда”. Бу ҳолат “бутун дунё кўз ўнгида, кўплаб ҳукуматларнинг фаол қўллаб-қувватлаши билан” амалга оширилмоқда.
“Гуманитар сулҳни талаб қилишдан бош тортиш ва БМТ Хавфсизлик кенгашининг ҳар икки томонни бунга мажбурлашига тўсқинлик қилиш орқали дунё етакчилари бу жиноятларга шерик бўлиб бормоқда”, — дея хулоса қилди Жоли.
Фаластин Соғлиқни сақлаш вазирлигининг сўнгги маълумотларига кўра, Ғазода Исроил зарбалари оқибатида ҳалок бўлганлар сони 8 796 кишига етди. Шулардан 3 648 нафари болалар, 2 290 нафари аёллар. Жароҳатланганлар 22 219 кишини ташкил этмоқда, 2 030 киши бедарак йўқолган.
БМТ маълумотларига кўра, Ғазо секторида ҳар куни 400 дан ортиқ бола ҳалок бўлади ёки яраланади.
7 октябрда Исроил ва ҲАМАС ўртасидаги уруш бошланганидан бери БМТ Хавфсизлик кенгаши Ғазо секторидаги гуманитар вазият бўйича тўртта резолюция лойиҳасини кўриб чиқди — иккитаси Россиядан, қолганлари Бразилия ва АҚШдан, бироқ уларнинг ҳеч бири қабул қилинмади.
Изоҳ (0)