2008 йилдан бери Анжелина Жоли ва Брэд Питтнинг умумий мулки ҳисобланган Chateau Miraval вино заводи бўйича суд иши давом этмоқда. Бу сафар Жоли собиқ турмуш ўртоғига янги айблов қўйди — Брэд Питт уни ва фарзандларини ҳеч вақосиз қолдиришга уринаётганини айтди.
Американинг Daily Mail нашри журналистлари томонидан ўтказилган текширувлар бунинг аксини тасдиқлади: Питт билан ажрашиш Жолига 100 миллион долларга яқин даромад келтирган. Бу маблағга кредитлар, алиментлар, турли совғалар ва Жолининг Chateau Miraval вино заводидаги 50 фоиз улушидан тушган даромадлар киради. Мазкур келишув туфайли юлдузлар суд иши ҳануз тугагани йўқ.
2022 йил февраль ойида Брэд Питт вино заводининг маълум улушини россиялик тадбиркор Юрий Шефлерга сотгани учун Анжелина Жолини судга берган эди. Актёрнинг сўзларига кўра, унинг собиқ рафиқаси ўз акцияларини ўзаро розиликсиз сотмаслик ҳақидаги битимни бузган. Ўша йилнинг сентябрь ойида Анжелина Брэдни уларнинг умумий мулкини ноқонуний ўзлаштириб олганликда айблаб, 250 миллион доллар миқдорда товон пулини ундириш талаби билан судга мурожаат қилган.
Актрисанинг тарафдорлари айтишича, мазкур суд жараёнини узайтириш орқали Брэд Питт собиқ рафиқасини назорат қилиш ва уни ҳеч нарсасиз қолдиришни мақсад қилган. Маълумотларни ошкор қилмаслик тўғрисидаги келишув сабабли Питт аслида ёлғон гапираётганини Жоли исботлай олмаяпти.
Актёр тарафдорлари эса Анжелина ундан барча пулларини тортиб олмоқчи эканлиги таъкидламоқда. Аниқланишича, сўнгги етти йил ичида Питт болаларни таъминлаш, улар учун психотерапия курслари ва бошқа қўшимча харажатлари учун тахминан 10 миллион доллар сарфлаган. Жоли эса бу вақт ичида Манҳэттенда бир вақтлар Энди Уорҳолга тегишли бўлган ва ойига 60 минг долларга ижарага берилган уйни сотиб олди.
Анжелина Жоли томонидан Брэд Питтга қўйилган айблов бўйича суд хулосаси яқин кунларда ўқиб эшиттирилади. Бироқ суд жараёни ҳали узоқ давом этиши кутилмоқда.
Эслатиб ўтамиз, Анжелина Жоли собиқ эри Брэд Питтни жисмоний таҳқирланиш ва зўравонликда айблаган эди.
Изоҳ (0)