“Ким кимга мос эканлигини ўзимиз биламиз”. Бобур Мансуровнинг рафиқаси актёр билан қандай танишгани ҳақида сўзлаб берди

Актёр ва вайнер Бобур Мансуровнинг рафиқаси Фариза Ориповна Instagram’даги саҳифасида кузатувчиларини қизиқтирган саволларга жавоб берди.  

— Танишувларингиз қандай бўлган?

— Танишганимизга 7-8 ой бўлди. Xonsaroy Music лойиҳасига қизиқиб, томоша қилиш учун боргандим. Ўша пайтда танишиб қолганмиз. Қолгани тақдирнинг иши.

— Қаердансиз ва нечанчи йилсиз?

— 2000 йилда Қашқадарёда туғилганман.

— Танишмасингиздан олдин Бобур Мансуров билан учрашишни орзу қилганмисиз?

— Тўғриси хаёлимга ҳам келмаган, чунки уларни Instagram’да кузатмасдим, обуна бўлмагандим. Видеолари чиқиб қолса, шунчаки томошабин сифатида томоша қилардим.

— Бу инсонга турмушга чиқишга қандай рози бўлдингиз, қайси хислати ёқди?

— Турмуш ўртоғимни қисман танийсиз. Улардек оқкўнгил, самимий, содда инсон санъат соҳасида кам учрайди. Умуман кибрга берилмаганлар. Ҳар қандай ҳолатда бир хил. Ҳурмат қиладиган ва ўрганишим керак бўлган хислатлари жуда кўп. Аллоҳнинг синовларига шукр қилган, иймонли инсонлар. Гапирсам гап кўп. Шунинг учун кўнгил қўйганман.

— Турмуш ўртоғингиз билан орангизда неча ёш фарқ бор?

— Ёшимиз орасидаги фарқ — 8 йил. Улар 1992 йилда туғилганлар. Аввало тақдир. Бир-биримизга кўнгил қўйдик. Дунёқарашларимиз тўғри келди. Кейин ота-онамизнинг дуоси ва розиликлари билан турмуш қурдик. Кўпчилик ижтимоий тармоқларда бир-бирига мос эмас, унга бошқа қиз мос эди, деб ёзганига кўзим тушди. Лекин шуни билингки, ким кимни ҳалол жуфти бўлиши керак эканини, бир-бирига тўғри келиш-келмаслигини фақат Яратган эгам ва кейин ўзимиз биламиз.

— Турмуш ўртоғингиз қизлар билан вайнга тушса, рашк қилмайсизми?

— Санъат соҳасини яхши тушунаман, уларнинг касблари шу. Рашк ҳар бир тирик инсонда бор. Лекин бизда меъёрида, деярли йўқ. Чунки уларнинг феъл-атворларини яхши биламан.

— Сиз қайси соҳада ўқигансиз?

— Ёшлигимдан санъат соҳасидаман. Яқинда Консерваторияни битирдим. Ҳозирда ўқитувчиман.

— Жанжаллашиб қолган пайтларингиз бўлганми?

— Бир марта бўлган, унаштирилганимиздан кейин. Лекин улар тез ҳазил қилиб, кулдириб, ярашадилар.

— Алоҳида яшайсизларми?

— Шунга ўхшаш саволлар кўп берилибди. Хизмат қиляпсизми, иш қила оласизми, дейишибди. Яна дарров Тошкентга кетиб қолдингизми, деб ҳам сўрашибди.

Мен қишлоқда, оддий оилада туғилганман. Аллоҳга шукр ҳар бир келин қиладиган вазифаларни қўлдан келганча қиляпман. Алоҳида эмасмиз, ҳали кетмадик. Қайнона, қайнотам билан биргамиз.

Маълумот учун, Бобур Мансуров ва Фаризанинг тўйи 20 ноябрь куни бўлиб ўтди. Никоҳ оқшомида ўзбек шоу-бизнесининг кўплаб таниқли вакиллари меҳмон бўлди.