“Мендирман Жалолиддин” сериалида бош қаҳрамонни гавдалантирган туркиялик актёр Эмре Кивилжим журналист Жасур Ҳамроевга берган интервьюсида кўплаб қизиқарли саволларга жавоб берди.
— Ўзбекистонга охирги пайтда тез-тез келасиз, бунинг сабаби нима?
— Ўзбекистон мен учун ўзгача аҳамиятга эга мамлакат. Мен ўзбекларнинг қаҳрамонини ижро этиш асносида мамлакатингизнинг тарихини ўргандим. Бу ерда кўплаб дўстлар орттирдим. Тарихий шаҳарларга саёҳат қилдим.
— Сизни Ўзбекистонда Жалолиддин сифатида танишмоқдами?
— Албатта, ўзбек томошабини мени Жалолиддин сифатида танийди. Аммо улар “Видо мактуби” сериалидаги образимни ҳам яхши билишади. Шу икки сериалдаги ролларим орқали танишмоқда.
— “Мендирман Жалолиддин”га катта пул сарфланди. Лекин маблағ ўзини оқламади. Бунинг сабаби нима деб ўйлайсиз?
— Биласизми, бу ерда телевисион сериаллар системаси бир оз бошқачароқ экан. Туркияда сериалларнинг янги қисми ҳафтада бир марта намойиш этилади. Томошабин ўша қисм чиқадиган кунни сабрсизлик билан кутади. Жалолиддин ҳам худди шундай — бир ҳафтада бир марта намойиш этилди. Лекин ўзбек томошабини сериални ҳар куни кетма-кет томоша қилишга одатланган экан. Ушбу сериал Туркиядаги энг катта лойиҳалардан бири сифатида эътироф этилади. “ATV” телеканалида намойиш этилганида юқори рейтингларни кўрсатди. Иккинчи фасли эса ундан ҳам муваффақиятлироқ чиқди. Сериал бир неча хорижий мамлакатларга ҳам сотилди.
— Туркияда сизни қанчалик танишади? Рейтингингиз қанақа?
— Бу саволингизга менинг жавоб беришим хато бўлади. Ўз рейтингим ҳақида ўзим гапира олмайман. Айни пайтда “Видо мактуби”ни тугатдик ва янги лойиҳа устида ишламоқдамиз.
— Сизни ўзбек актрисаси Юлдуз Ражабова билан бирга кўришга одатланганмиз. Айни пайтдаги муносабатларингиз қандай?
— Юлдуз билан ҳали ҳам гаплашамиз, кўришиб турамиз. Муносабатларимиз ҳаммаси яхши. Севгимиз битмас, у мозорга қадар. Юлдузни ҳалиям юрагимдан севаман.
Изоҳ (0)