Россия қўшинлари 8 июль куни эрталаб Киев ва Украинанинг бошқа шаҳарларига йирик ракета зарбаси бериши оқибатида 33 нафар киши ҳалок бўлди, 140 нафари жароҳатланди. Бу ҳақда Украина ФВВ хабар берди.
Киев раҳбари Виталий Кличконинг айтишича, 96 киши жароҳатланган, улардан 52 нафари касалхонага ётқизилган. Украина ИИВ мамлакат бўйлаб амалга оширилган йирик ракета ҳужуми оқибатида 31 киши ҳалок бўлгани, 125 киши жароҳатлангани ҳақида хабар берган.
Киев ҳарбий маъмуриятининг маълум қилишича, Соломенский туманида маъмурият биноси, кўп қаватли уйнинг икки қавати шикастланган ва 1500 квадрат метр майдонда вайронагарчилик қайд этилган. Бу ерда етти киши ўлими қайд этилган.
Киевда ракета ҳужуми натижасида Голосеевский ва Шевченковский туманларидаги учта трансформатор подстанцияси, шунингдек, электр тармоғи бутунлай вайрон бўлган ёки шикастланган.
Шунингдек, ракета Киевнинг Шевченковский туманидаги болалар шифохонаси биноларидан бирига келиб тушган.
Украина ССВ раҳбари Виктор Ляшконинг сўзларига кўра, ракета болалар диализ олаётган бинога келиб тушган. Реанимация бўлимлари, операция хоналари ва онкология бўлими шикастланган. “Охматдет” беморлари шаҳардаги бошқа шифохоналарга эвакуация қилинган.
Украина президенти девонхонаси раҳбари Андрей Ермак Россия қўшинлари болалар касалхонасига “мақсадли” зарба берганини таъкидлаган.
Ушбу ўққа тутиш тинч аҳолига қарши амалга оширилди, улар инфратузилмага зарба берди. Бутун дунё бугун террор оқибатларини кўриши керак, бунга жавоб фақат куч билан бўлиши мумкин, дейди Ермак.
Украина президенти Владимир Зеленский шифохонада вайроналар остида одамлар борлигини айтиб, вайроналарни тозалашга шифокорлар, оддий одамлар жалб қилинганини маълум қилган.
Россия ўз ракеталари қаерда учаётганини билмай қолиши мумкин эмас ва одамларга, болаларга, умуман инсониятга қарши жиноятлари учун тўлиқ жавоб бериши керак. Дунё ҳозир бу ҳақда жим турмаслиги ва ҳамма Россия нима қилаётганини кўриши жуда муҳим, дея таъкидлаган Украина раҳбари.
Изоҳ (0)