Тошкентнинг Чилонзор туманидаги 188-мактабда рус тили фани дарсида ўқитувчи ўқувчини калтаклагани ҳақида хабар берилганди. Россия Ташқи ишлар вазирлиги расмий вакили Мария Захарова ҳолат бўйича Ўзбекистондан тушунтириш сўралганини айтди.
Захарова видео мазмунидан “ниҳоятда ташвишлангани”ни билдирди. У мазкур ҳодиса юзасидан Москва Тошкентдан тушунтириш сўраганини таъкидлади.
Икки давлат ўртасидаги стратегик шериклик ва иттифоқчиликка асосланган дўстона муносабатларда ҳеч қандай адоватга, айниқса, тил масаласида ўрин йўқ ва бўлиши ҳам мумкин эмас, деди у.
Мария Захарова Россия Ўзбекистондан юз берган ҳодисага ҳуқуқий баҳо беришни ва болага нисбатан шафқатсизлик қилган айбдорга қарши чоралар кўришни сўраганини айтди.
Бу масалани диққат-эътиборимиз марказида тутамиз”, дея хулоса қилди Россия Ташқи ишлар вазирлиги расмийси.
Тошкентдаги 188-мактабда юз берган ҳолат
Шаҳар мактабгача ва мактаб таълими бошқармаси матбуот хизматига кўра, воқеа 23 сентябрь куни 6-“B” синфида рус тили фани дарсида юз берган.
Ўқитувчи Р.О. га ўқувчи Э.Г. гап қайтарган ва тортишиб қолган. Сўнгра ўқитувчи ўқувчини қулоғидан чўзган, ўтирган жойидан партасидан тортиб олиб чиққан ва ўқувчининг юзига тарсаки туширган. Ўқувчига тан жароҳати етказилмаган, саломатлиги жойида.
Facebookъдаги “Потребител.uz” гуруҳида ёзилишича, ўқитувчи рус синфига дарсни ўзбек тилида ўтган. Ўқувчи дарсни рус тилида ўтишни сўраган. Шундан сўнг видеода акс этган ҳолат юз берган.
Воқеадан хабар топган ўқувчи Э.Г.нинг ота-онаси ўқитувчининг бу хатти-ҳаракати юзасидан ҳуқуқ-тартибот идораларига мурожаат қилган. Айни пайтда суриштирув ишлари олиб борилмоқда.
Хабарда қўшимча қилинишича, рус тили фани ўқитувчиси Р.О. синов муддати билан мактабга ишга таклиф қилинган, расман ишга қабул қилингани бўйича ҳали буйруқ чиқмаган ва юқоридаги воқеа унинг дастлабки иш кунида содир бўлган.
Изоҳ (1)
Яқинда питерда автобусда кетаётганимда уйдан телфон бўлиб қолди.қисқа,секин гаплашдим.Шунда бир ёши катта киши бу ер Россия,русча гапиришнинг шарт ўзбекчани Ўзбекистонга борганингда гапирасан деб менга ўдағайлади.русларни кўпчилиги миллатчи.