Шахмат бўйича Жаҳон чемпиони, норвегиялик гроссмейстер Магнус Карлсен Саудия Арабистонининг Риёд шаҳрида бўлиб ўтган Esports World Cup киберспорт турнирида ғалаба қозонди.
Финал баҳсида 34 ёшли Карлсен (Team Liquid) франциялик Алиреза Фирузжани (Team Falconс) икки сетда ҳам 3:1, 3:1 ҳисобида мағлуб этди. Учинчи ўрин учун баҳсда америкалик Ҳикару Накамура (Team Falconс) ҳиндистонлик Аржун Эригайисини (Gen.G Esport) 5:3, 5:2 ҳисобларида енгиб, бронза медалига эга чиқди.
Турнирда ўзбекистонлик икки нафар шахматчи Нодирбек Абдусатторов (Navi) ҳамда Жавоҳир Синдоров (Team Vitality) ҳам қатнашган эди. Жавоҳир мусобақани гуруҳ босқичида якунлаган бўлса, Абдусатторов чорак финалда имкониятни бой берди.
Турнир ғолиби Магнус Карлсен 250 минг доллар пул мукофотини қўлга киритди. Иккинчи ўринни эгаллаган Фирузжа 190 минг доллар, учинчи бўлган Накамура эса 145 минг доллар ишлаб олди. Тўртинчи ўрин соҳиби Эригайси эса 115 минг доллар билан тақдирланди.
Нодирбек Абдусатторов 5—8-ўринларн эгаллади ва 85 минг АҚШ доллари мукофотига эга чиқди. Иштирокини гуруҳ босқичида якунлаган Жавоҳир Синдоров эса 50 минг АҚШ долларини қўлга киритди.
Маълумот учун, Esports World Cup доирасида шахмат ҳам киберспорт тури сифатида тан олинган. Шу боис мусобақа иштирокчилари бир залда, компьютерлар орқали ўзаро беллашишди.
Изоҳ (0)