Дуэйн Жонсон: Голливуднинг энг бой актёри қандай яшайди?

Дуэйн Дуглас Жонсон, “Қоя” лақаби билан ҳам танилган, нафақат Голливуднинг энг юқори маош оладиган истеъдодли актёри, балки бизнесмен ва продюсердир. Унинг муваффақият тарихи бутун дунё бўйлаб миллионлаб мухлисларни ҳайратга солади ва илҳомлантиради.

Дуэйн Жонсон 1972 йил 2 майда Калифорниянинг Ҳейворд шаҳрида, АҚШда туғилган.

Жонсоннинг болалиги Янги Зеландияда ўтади, у Грэй Линн туманида жойлашган Ричмонд Роад бошланғич мактабида ўқийди.

Актёр 14 ёшидан 17 ёшигача ўғрилик ва муштлашувлар сабаб бир неча марта ҳибсга олинганини тан олади.

Дуэйн Жонсоннинг бўйи ҳозир 196 см. Ўрта мактабда ўқиётганида бўйи 193 см ва вазни 102 кг бўлган. Кўплаб синфдошлари уни махфий полиция ходими деб ўйлаган.

У курашчилар оиласида катта бўлган, Жонсоннинг отаси ва бобоси профессионал рестлер (кураш) билан шуғулланган, бувиси эса полинезия профессионал курашининг илк промоутери бўлган.

Аввалига Жонсон ФҚБ (Федерал қидирув бюроси)да ишлашни хоҳлайди, шунинг учун у Майами университетининг криминология ва физиология факультетида ўқийди.

Жонсон илк бор 1996 йилда WWЕда Рокки Майвиа номи остида рингга чиқади. Ушбу тахаллус отасининг исми Рокки ва бобосининг фамилияси Майвиа бирлашмасидан ташкил топган.

Карьера ва молиявий муваффақият

Ўз фаолиятини WWЕда профессионал рестлер курашчиси сифатида бошлаган Дуэйн Жонсон мухлислар меҳрини қозониб, кино оламига кириб келади. Натижада турли жанрдаги фильмларда — экшндан комедиягача томошабинларнинг севимли актёри бўлиб қолади.

Ҳозирда Жонсон Голливуддаги энг бой одамлардан бири бўлиб, актёрлик маҳорати, продюсерлик ва бизнес лойиҳалари билан даромад топмоқда.

Ўзининг Seven Bucks Productions компанияси орқали у ўзи бош ролларни ўйнайдиган блокбастерларни суратга олмоқда ва бошқа йирик студиялар билан ҳамкорлик қилмоқда.

2024 йил бошига келиб, актёрнинг бойлиги 500 миллион доллардан ошиб кетди. У пулини эксклюзив автомобилларга, кўчмас мулкка, самолётлар сотиб олишга ва хайрия лойиҳаларига сарфлайди.

Жонсон “Қоя” тахаллуси остида курашиб, 1996 йилдан 2004 йилгача моҳир рестлер курашчиси сифатида ном қозонган. У ўз фаолияти мобайнида тарихдаги энг кассабоп курашчилардан бири бўлган.

Стивен Колбертга берган интервьюсида айтишича, дастлаб у ҳар бир матч учун 40 доллар олган. Курашчилик карьераси якунлангач, Жонсон кураш юлдузидан кино юлдузига ўтишнинг қийин босқичини бошдан кечиради.

У 2001 йилда “Мумия 2” фильмидаги роли учун 5,5 миллион доллар гонорар олиб, муваффақиятга эришади. Унинг шон-шуҳрати ва гонорари “Форсаж” фильмидан кейин янада ошади.

2018 йилда Жонсон 124 миллион доллар ишлаб топиб, Forbes рўйхатида энг кўп гонорар оладиган актёрга айланади.

У шунингдек, собиқ рафиқаси Дени Гарсия билан Seven Bucks Productions компаниясини бошқаради.

Улар мазкур студияни ажрашганларидан кейин 2012 йилда ташкил этган. Seven Bucks орқали улар Жонсоннинг энг йирик ҳит фильмларини суратга олади.

Жонсоннинг чўнтагида бор-йўғи етти доллар бўлган вақтлар хотираси учун продюсерлик компанияси Seven Bucks номини олган.

2016 йил бошида Under Аrmour актёрнинг асосий ҳомийсига айланади, аммо у ягона ҳомий эмасди.

2016 йилда у компания билан ўзининг “DJ Inspired” кийимлар тармоғини ишлаб чиқариш бўйича шартнома имзолайди. 2018 йил июнь ойида унинг 130 долларлик кроссовкалари 30 дақиқада сотилиб кетади.

Актёр For ва Apple билан ҳам шартномалар тузган. Маълумотларга кўра, у биргина шу келишувлардан йилига 15 миллион доллар ишлаб олади.

Жонсон ҳар қандай фильм учун камида 20 миллион доллар талаб қила оладиган актёр ҳисобланади.

У ўзнинг ижтимоий тармоқларидаги саҳифаларида фаол равишда реклама олади —  “Қизил огоҳлантириш” фильмини аккаунтида эълон қилгани учун Netflix Жонсонга 1 миллион доллар тўлаган.

Шунингдек, у Teremana Tequila ва ўзининг газланган ичимликлар бренди Zhао Energy билан ҳамкорлик қилиш орқали ичимликлар саноатига кириб бормоқда.

2020 йил март ойида Жонсон Tequila компаниясига асос солади ва қисқа вақт ичида машҳурликка эришади.

Ўша йилнинг июнь ойида Жонсон Zhао Energy ичимлигини ишлаб чиқаради. 2021 йилги CNBC ҳисоботига кўра, ичимлик 26 000 дан ортиқ чакана савдо дўконларида ва 100 000 дан ортиқ тарқатиш пунктларида сотилади.

Оиласи ва севимли машғулотлари

Голливуд актёрининг иккинчи рафиқаси — унинг мусиқий продюсери Лорен Хашиан билан 2019 йилда турмуш қуради.

Жуфтлик 2019 йил 18 август куни Гавайида никоҳдан ўтади. Уларнинг тўйи денгиз қирғоғида, зиёфат ва ажойиб гуллар билан безатилган жойда бўлиб ўтади. Тўй ёпиқ эшиклар ортида, фақат эр-хотиннинг яқин қариндошлари иштирокида ўтказилади.

Дуэйннинг Лорен билан муносабати актёрнинг собиқ рафиқаси Дени Гарсия билан ажрашганидан кейин маълум бўлади. Собиқ эр-хотиннинг 10 йиллик никоҳидан 21 ёшли Симоне исмли қизи бор.

Ажралиш чоғида Дуэйн ва Дени имзолаган қўшма баёнотда шундай дейилган:

Муносабатларимизнинг баъзи жиҳатлари ўзгарган бўлса-да, иккаламиз ҳам бир-биримизнинг ҳаётимизда жуда муҳиммиз.

Биз бизнес манфаатларимиз, хайрия ишларимизни илгари суриш ва бошқаришда давом этамиз, энг муҳими, фарзандимизни меҳрибон ота-она сифатида бирга тарбиялаймиз.

Биз сўнгги 17 йилни эр-хотин сифатида бирга ўтказиш бахтига муяссар бўлдик. Энди ҳаётимизнинг қолган қисмини қадрдон дўст ва бизнес шерик сифатида бирга ўтказишга умидвормиз.

Ҳозирда 50 ёшли собиқ курашчи кўп вақтини рафиқаси Лорен Хашиан ва уч фарзанди — Симоне, Ясемин ва Тиана билан ўтказади.

Дуэйн Жонсоннинг севимли машғулоти — бу машқ қилиш ва спорт залида ишлашдир. Унинг фитнесга бўлган иштиёқи футболчи, курашчи ва актёр сифатидаги муваффақиятига пойдевор бўлган. Бундан ташқари, унинг ҳоббиларига мусиқа тинглаш, фильм томоша қилиш ва балиқ овлаш киради.