“Толибон” Ғазни шаҳрида гўзаллик салонига борган келин, унинг қариндошлари ва салон эгасини калтаклади. Бу ҳақда Hasht-e Subh Daily хабар берди.
Маълум қилинишича, “Толибон” кучлари Ғазнида фаолият юритаётган аёллар гўзаллик салонига бостириб кирган. Камида беш нафар аёл, жумладан келин ва салон эгасини калтаклаган. Бунга уларнинг гўзаллик салонларини ёпиш буйруғига амал қилмагани сабаб бўлган.
Бундан ташқари, “Толибон” Жалолобод шаҳридаги тўй меҳмонхонасига ҳужум қилиб, у ердаги мусиқа асбобларини синдирган. Мусиқа яна янграса, меҳмонхона ёпилиши ҳақида огоҳлантирилган. Ҳозирча Нангарҳор ва Ғазнидаги маҳаллий “Толибон” расмийлари бу воқеалар ҳақида ҳеч нарса демаган.
Афғонистонда аёллар гўзаллик салонларининг ёпилиши мамлакат фуқаролари ва инсон ҳуқуқлари ташкилотларининг кескин муносабатига сабаб бўлган.
БМТнинг Афғонистондаги миссияси бундай сиёсат мамлакат иқтисодиётига зарар етказиши ва “Толибон”нинг аёллар меҳнатини қўллаб-қувватлаш ҳақидаги даъволарига зид эканини айтган.
Афғонистонда аёлларга нисбатан жорий қилинган тақиқлар
- Афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш тақиқланган.
Изоҳ (0)