“Толибон”га мухолиф Афғонистон “Миллий жунбиш” партияси етакчиси маршал Абдурашид Дўстум “Толибон”ни енгиш учун АҚШнинг сиёсий кўмагига муҳтож эканини айтди.
Афғонистондаги ҳарбий-сиёсий можароларда 40 йилдан ортиқ иштирок этган 69 ёшли Дўстум 2021 йил 14 август куни Мозори Шарифдаги шиддатли тўқнашувдан сўнг Афғонистонни тарк этганди. У аввал чегарадан Ўзбекистонга ўтиб, у ердан Туркияга кетган.
Дўстим Rolling Stone нашрига берган интервьюсида “Толибон”га сабоқ беролмаса, исмини ўзгартиришини айтди.
“Толибон бизни алдади. Уларга қарши курашиш зарур. Бизга Америка танклари ёки самолётлари керак эмас. Бизга фақат уларнинг сиёсий ёрдами керак. Агар мен уларга (“Толибон”га) сабоқ бериб қўймасам, исмим Дўстум эмас”.
Интервьюда Дўстум Жузжон вилояти “Толибон”га бой берилган вақтда, у “душманлари” томонидан заҳарланганини айтди. Унинг қўшимча қилишича, ўшанда Шабирғондан Мозори Шарифга кўчирилган ва у ердан Туркияга даволаниш учун кетган.
Дўстум Афғонистон собиқ ҳукумати армиясининг қулашига собиқ президент Ашраф Ғанининг нотўғри бошқаруви сабабчи, деган фикрда.
“Биз ‘Толибон’га қарши бўлган халқни тўплай олмаган одамнинг бошқаруви остида эдик”.
Дўстумнинг айтишича, унда туман ва шаҳарларни қайтариб олиш ва “Толибон”ни тинчлик музокараларини бошлашга мажбурлаш режаси бўлган. Аммо Ашраф Ғани унинг ёнида туриб бермаган, америкаликлар ҳам унга қулоқ солмаган.
Дўстум энди “Толибон”ни қайта мағлуб этишга тайёрлигини айтди.
“Илтимос, бутун дунёга айтинг, Америкага айтинг. Жо Байден Пентагондан ва мен билан ишлаган генераллардан сўрасин, Дўстум айтганини қила оладими? Ҳа мен қила оламан! Агар улар мени сиёсий жиҳатдан қўллаб-қувватласа, ‘Толибон’ масаласи тугайди. 24 соатдан кейин мен Афғонистонда қайтаман”.
Изоҳ (0)