Афғонистоннинг Бодғис вилоятида қиз мажбурий никоҳ сабабли ўзини отиб ўлдирди. Бу ҳақда Hasht-e Subh Daily хабар берди.
Маълум қилинишича, воқеа 25 июль куни Қадс ҳудудида содир бўлган. Манбалар қизнинг ўзини ўлдиришига мажбуран турмуш қуриш сабаб бўлганини айтмоқда. Марҳума неча ёшда экани очиқланмаган.
Тахминан 10 кун аввал жабрланувчи унинг розилигисиз бир бола билан унаштирилган. Бодғисдаги маҳаллий “Толибон” вакиллари ҳозирча бу ҳақда ҳеч қандай маълумот бермаган.
Бу қўшни республикада қизларнинг мажбурий никоҳ сабабли ўзини ўлдириши билан боғлиқ биринчи ҳолат эмас. Аввалроқ Сарипул вилоятида мажбурий никоҳ сабабли 15 ёшли қиз ўз жонига қасд қилганди. Парвон вилоятида 22 ёшли қиз билан боғлиқ шундай ҳолат юз берган. У Калашников автоматидан ўзига ўқ узган.
Мажбурий никоҳ, оиладаги зўравонлик ва руҳий муаммолар Афғонистонда аёлларнинг ўз жонига қасд қилишининг асосий сабаблари сифатида кўрилмоқда.
Эслатиб ўтамиз, аввалроқ “Толибон” ҳаракатининг расмий вакили Афғонистонда мажбурий никоҳ тақиқланганини маълум қилганди. Тақиқ асосида Қундуз вилоятида 50 ёшли эркакнинг 12 ёшли қизни мажбуран никоҳига олишига рухсат берилмаган. Ҳолат юзасидан айбдорлар қўлга олинган, улар суд жараёнини кутмоқда. “Толибон” тақиққа риоя қилмаганлар қонуний жавобгарликка тортилишини маълум қилган.
Изоҳ (0)