“Толибон”нинг Эзгуликни тарғиб қилиш ва иллатларга қарши курашиш вазирлиги аёллар гўзаллик салонлари ёпилаётгани сабабини тушунтирди. Бу ҳақда Hasht-e Subh Daily хабар берди.
Вазирликка кўра, Афғонистонда гўзаллик салонлари учун харажатлар беҳудалиги, соч кўчириб ўтказиш ва қош териш эса шариатга зидлиги учун ёпилмоқда. Вазирлик вакили Муҳаммад Содиқ келаси ой бошидан гўзаллик салонлари эгаларига ишлашга рухсат берилмаслигини айтди. У ёмон иқтисодий вазиятда салонларнинг нархи “осмон” эканини билдирди.
Мулозим шариатга кўра, бир кишининг сочини бошқа одамга зеб-зийнат учун кўчириб ўтказиш мумкин эмаслигини айтди.
“Гўзаллик салонларида аёлларга ортиқча соч кўчириб ўтказилади ва аёлларнинг қошлари олинади, бу эса шариат қонунларига мутлақо зиддир”, — деди у.
“Толибон” Жамоатчилик билан алоқалар вазирлиги вакили аёллар салонларида бўянган аёлнинг таҳорати бузилишини таъкидлади.
Афғонистонда аёллар гўзаллик салонларининг ёпилиши мамлакат фуқаролари ва инсон ҳуқуқлари ташкилотларининг кескин муносабатига сабаб бўлди.
Бирлашган Миллатлар Ташкилотининг Афғонистондаги миссияси бундай сиёсат мамлакат иқтисодиётига зарар етказиши ва “Толибон”нинг аёллар меҳнатини қўллаб-қувватлаш ҳақидаги даъволарига зид эканини айтди.
Афғонистонда аёлларга нисбатан жорий қилинган тақиқлар
- Афғонистонлик аёлларнинг БМТ идораларида ишлаши,
- эркакларга аёллар учун кийим тикиш,
- аёлларнинг эркак шифокорларга бориши,
- аёлларнинг шифохонага ёлғиз бориши ва
- уларнинг истироҳат боғига ташриф буюриши,
- Афғонистонда оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш тақиқланган.
Изоҳ (0)