Афғонистонда тўй харажатлари ва маҳр пули қанча? (видео, фото)

Афғонистонда “Толибон” ҳукуматининг Эзгуликни тарғиб қилиш ва иллатларга қарши курашиш вазирлиги тўйдаги ортиқча сарф-харажатларнинг олдини олиш тўғрисида қарор чиқарган. Унда хусусан, қизлар ва беваларга тўланадиган маҳр пулининг чегараси белгилаб қўйилган. “Дарё”нинг Афғонистондаги мухбири бир неча ҳудудлар мисолида маҳр миқдори ва тўйга пул топиш учун йиллаб хорижда ишлаётган одамлар ҳақида ҳикоя қилди.

Парвон вилоятининг Жабал-Уссараж туманида Уламолар кенгаши ёш қизнинг маҳрини 100 минг афғоний (1 140 доллар) этиб белгилаган, шундан 30 минг афғоний, яъни 340 доллар тўғридан тўғри келинга берилиши кўрсатилган. Расмий қарорга кўра, келиннинг оиласи тўй маросими тугагунига қадар бўлган харажатлар учун ҳам шу пулдан ишлатиши керак.

Беваларнинг маҳри 50 000 афғоний, яъни 570 доллар, қўшимча равишда 10 грамм олтин айтилган. Қизлар учун эса 25 грамм араб олтини берилиши кўрсатилган.

Кенгаш қарорининг тўртинчи моддасида ҳар икки томоннинг меҳмонларга зиёфати  пешин вақтида ўтказилиши кераклиги айтилган. Шунингдек, тўй томонлари бир-бирига байрамларда ширинлик юбориши каби ҳар қандай ортиқча маросимлар ман этилган. Парвон вилояти Уламолар қарорида қоидабузарларга нисбатан жиддий “қонуний” чоралар кўрилиши ҳақида огоҳлантирилган.

Каписа вилоятининг Коҳистон туманида ёш қизлар учун маҳр пули 150 минг афғоний, яъни 1 700 доллар қилиб белгиланган. Коҳистон туманида “Толибон” томонидан тайинланган ҳоким Абдулматин Саид халқ билан учрашувда бева аёлларнинг маҳри 80 минг афғоний, яъни 900 доллар эканини айтган. У куёв томоннинг оиласи бошқа ҳеч қандай харажат қилмаслигини таъкидлаб, унаштириш маросимлари, ҳайит, туғилган кунлар, келиннинг гўзаллик салонига бориши ва бошқа кўплаб тадбирларни тақиқлаган.

Коҳистон ҳокими қарорга бўйсунмаганлар 150 минг афғоний (1 700 доллар) миқдорида жаримага тортилиши ва “Толибон” суди томонидан жазоланиши ҳақида огоҳлантирган.

“Дарё” мухбири Афғонистонда тўй харажатлари жуда катта, тўйхоналар ниҳоятда ҳашаматли эканини таъкидлади.

Афғон йигитларининг кўпчилиги тўйга пул топиш мақсадида Эрон, Покистон, Туркияга кетади ва ушбу мамлакатларда йиллаб меҳнат қилади.

Сарпул вилоятида яшовчи Довуд исми кишининг “Дарё” мухбирига айтишича, у уч йил аввал катта харажат билан уйланган, кейин қарзларни тўлаш учун ноқонуний йўллар билан Эронга кетган, чегарада эронлик чегарачилар томонидан калтакланган. Унга кўра, ҳалигача қайнотасидан 600 минг афғоний (6 850 доллар) қарздор, уни тўлаш учун кеча-ю кундуз ишлайди.

Жўзжон вилоятининг Ақча туманида яшовчиси Худойназар исми киши тўйларга 6 минг доллар ва ундан ортиқ маблағ сарфланишини, харажатлар жуда катта эканини айтди.