“Tolibon” G‘azni shahrida go‘zallik saloniga borgan kelin, uning qarindoshlari va salon egasini kaltakladi. Bu haqda Hasht-e Subh Daily xabar berdi.
Ma’lum qilinishicha, “Tolibon” kuchlari G‘aznida faoliyat yuritayotgan ayollar go‘zallik saloniga bostirib kirgan. Kamida besh nafar ayol, jumladan kelin va salon egasini kaltaklagan. Bunga ularning go‘zallik salonlarini yopish buyrug‘iga amal qilmagani sabab bo‘lgan.
Bundan tashqari, “Tolibon” Jalolobod shahridagi to‘y mehmonxonasiga hujum qilib, u yerdagi musiqa asboblarini sindirgan. Musiqa yana yangrasa, mehmonxona yopilishi haqida ogohlantirilgan. Hozircha Nangarhor va G‘aznidagi mahalliy “Tolibon” rasmiylari bu voqealar haqida hech narsa demagan.
Afg‘onistonda ayollar go‘zallik salonlarining yopilishi mamlakat fuqarolari va inson huquqlari tashkilotlarining keskin munosabatiga sabab bo‘lgan.
BMTning Afg‘onistondagi missiyasi bunday siyosat mamlakat iqtisodiyotiga zarar yetkazishi va “Tolibon”ning ayollar mehnatini qo‘llab-quvvatlash haqidagi da‘volariga zid ekanini aytgan.
Afg‘onistonda ayollarga nisbatan joriy qilingan taqiqlar
- Afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish taqiqlangan.
Izoh (0)