Ҳиндистон ҳукумати Бирлашган Миллатлар Ташкилотининг Жаҳон озиқ-овқат дастури билан келишув имзолади, унга кўра Афғонистонга 10 минг тоннага яқин буғдой жўнатилади, деб хабар бермоқда “Дарё”нинг Афғонистондаги мухбири.
Ҳиндистон оммавий ахборот воситаларининг хабар беришича, ушбу келишув Ҳиндистон Ташқи ишлар вазирлиги ва БМТнинг Жаҳон озиқ-овқат дастури ўртасида Мумбайда имзоланган. БМТ дастури Ҳиндистонни Афғонистон аҳолисининг заиф қатламига буғдойни қисқа фурсатда етказиб бериш учун зарур инфратузилма мавжудлигига ишонтирган.
Чабаҳор порти орқали Афғонистонга юборилаётган ушбу буғдой БМТ дастури ёрдамида Афғонистондаги муҳтожларга бериладиган бешинчи ёрдам бўлади.
Афғонистон ўн йилдан ортиқ вақтдан бери оғир даврни бошдан кечирмоқда. Мамлакатда иқтисодий ва хавфсизлик нуқтаи назаридан кўплаб муаммолар бор. Афғонистонликлар ҳам қонуний ҳам ноқонуний йўллар билан Европа мамлакатларига кўчиб ўтиш учун мамлакатни тарк этишга уриниб келади. Уларнинг кўпчилиги йўлда Туркия ва Греция сувларида ҳалок бўлаётгани ҳақида хабарлар берилади.
Айни пайтда Афғонистондаги иқтисодий вазият энг оғир аҳволда. БМТ Жаҳон озиқ-овқат дастури Афғонистонда 28 миллиондан ортиқ одам егуликка муҳтожлигини маълум қилган.
Изоҳ (0)