Хитойнинг Gochin компанияси расмийлари ва вакиллари Афғонистондаги литий захираларига 10 миллиард доллар сармоя киритишдан манфаатдор эканини маълум қилди. Бу ҳақда “Дарё”нинг Афғонистондаги мухбири хабар берди.
Маълумот “Толибон” ҳукуматининг кон ва нефть вазирлиги томонидан эълон қилинган. Унга кўра, мазкур инвестициялар мамлакатда 120 минг тўғридан-тўғри ва бир миллион билвосита иш ўрни яратиш имконини беради.
Хитой компанияси етти ой ичида Афғонистон шимолий вилоятларидаги энг йирик транспорт йўлларидан бири бўлган Соланг ўтиш йўлини таъмирлайди, яна бир туннел қазийди.
Компания литий захираларини қазиб олиш жараёни Афғонистон ичида олиб борилаётгани, уни қайта ишлаш учун Кумар ва Лағмон йўлларини асфалтланиши ҳамда гидроэлектр станцияси қурилишини таъкидлади.
“Толибон” ҳукуматининг кон ва нефть вазири Шаҳобиддин Деловер Gochin компаниясининг Афғонистондаги литий конларига сармоя киритишга бўлган қизиқишини олқишлади ва литий дунёдаги ноёб конлардан бири эканини айтди. У барча афғон халқининг “умиди” мамлакатнинг литий конларига қаратилганини қайд этди.
Январь ойида Толибоннинг кон ва нефть вазирлиги Хитойнинг China Oil Economic and Information Research Center компанияси билан Аму нефть конини қазиб олиш бўйича шартнома имзолаганди, унинг Афғонистондаги улуши 20 фоизни ташкил этади ва келажакда 75 фоизга етказилади. “Толибон” Афғонистонни эгаллаб олганидан бери Хитой ҳозирги режим билан иқтисодий алоқалар орқали ўз таъсирини оширди.
Оммавий ахборот воситаларининг ёзишича, Хитой компаниялари Афғонистоннинг 1 триллион доллардан ортиқ баҳоланган литий захираларига киришни узоқ вақтдан бери орзу қилган.
Изоҳ (0)