АҚШ президенти Жо Байден навбатдаги президентлик сайловларида иштирок этишга қарор қилди. У тез орада сайловолди кампанияси ҳақида эълон қилишга ваъда берди.
“Мен бунинг ҳисоб-китобини аллақачон қилганман. Тез орада бу ҳақда эълон қиламиз. Сафарим нима қилиш мумкинлиги борасида некбинлигимни янада оширди. Сизга айтдим, менинг режам — яна қатнашиш”, — деди Байден Дубльинни тарк этишдан олдин журналистларга.
Бу орада АҚШ собиқ давлат котиби Майк Помпео Республикачилар партиясидан 2024 йилги сайловда қатнашмаслигини айтди. У ўз қарорини Fox News телеканалига берган интервьюсида маълум қилди.
“Мен қарор қабул қилдим. Биз 2024 йилдаги сайловда қатнашмайдиган бўлдик. Америка ҳақида ва мен сўнгги бир ярим йил давомида, аниқроғи ўнлаб йиллар давомида гапириб келаётган масалалар ҳақида чуқур қайғурсак ҳам, ҳали бизнинг вақтимиз келмаганини тушуниш керак”, — деди Помпео.
Бу қарор илгари унинг бошлиғи бўлган собиқ президент Дональд Трампнинг сайловдаги иштироки билан боғлиқми, деган саволга Помпео инкор жавобини берди, сўнг республикачилардан ҳар қандай номзодни тўлиқ қўллаб-қувватлашини қўшимча қилди. У сайловда иштирок этишдан бош тортганини оилавий шароит билан изоҳлади.
2021 йилда Помпео, агар Трамп президентлик учун курашишдан бош торца, сайловда ўз номзодини қўйиш нияти ҳақида маълум қилганди. Ўшанда у АҚШ келажагидан жуда хавотирда экани ва консерватив қарашларга амал қилишни режалаштираётганини айтган.
Помпео 2018 йилдан 2021 йилгача Трампнинг давлат котиби бўлган.
АҚШда келгуси президентлик сайлови 2024 йил 5 ноябрга белгиланган. Трамп унда иштирок этиши ҳақида аллақачон эълон қилган.
Изоҳ (0)