Финляндия ҳукумати Россия билан чегарада панжарали деворнинг биринчи 75 километрлик қисмини қуришга тайёрланмоқда, деб хабар берди Reuters.
Финляндия томони қурилишни ноқонуний миграцияга қарши кураш ва ўз хавфсизлигини ошириш билан изоҳламоқда.
Девор 2026 йилгача 200 километр узунликда бўлади.
Деворнинг баландлиги уч метр, тепасида тиканли сим ўрнатилади. Панжара тунги видеокузатув режими, муҳим ҳудудларда ёритиш чироқлари ва динамиклар билан жиҳозланади.
Аввалроқ Финляндия президенти Саули Ниинистё НАТОга аъзо бўлиш “барча муаммоларни ҳал этолмаслигини” айтганди. Финляндия раҳбарининг таъкидлашича, мамлакат Шимолий Атлантика алянсига қўшилганидан кейин ҳам “ўз хавфсизлиги учун асосий масъулиятни ўзи зиммасига олади”, шунинг учун “қаерда бўшлиқ ёки заифлик топилса, уларни тўлдириб, мустаҳкамлаш керак”.
4 апрель куни Финляндия расман НАТОга қўшилди ва унинг 31-аъзосига айланди.
Россия билан 1 340 километрлик чегарага эга Финляндия Россиянинг Украинага кенг кўламли босқинидан кейин минтақавий хавфсизлик масалаларига эътиборини кучайтирган.
Изоҳ (0)