Ўзбекистонда яширин иқтисодиётнинг умумий иқтисодиётдаги улуши 6 йилда 45-50 фоиздан 35 фоизга туширилди.
Сўнгги йилларда яширин иқтисодиётга қарши кураш фонида солиқ турлари 13 тадан 9 тага камайтирилиб, 100 дан ортиқ турдаги лицензия ва рухсатномалар бекор қилинган.
Шунга қарамай, республикага товарларни ноқонуний олиб кириш ва маҳсулотларни яширин цехларда ишлаб чиқаришга уринишлар кўп кўзга ташланмоқда.
Шу каби ҳолатлардан бирида пойтахтнинг Учтепа туманида ўтказилган тезкор тадбирда аввалдан кузатувга олинган шахслардан бири сифати ва божхона расмийлаштирувини тасдиқловчи ҳужжатлари бўлмаган стоматологик асбоб-ускуналарни сотишга уринган вақтида тўхтатиб қолинди.
Тезкор тадбир давом эттирилиб, ушбу шахс ноқонуний олиб кирилган товарларни сақлашга мўлжалланган яширин жойда қиймати 2 миллиард сўмлик 116 турдаги 9 730 дона стоматологик буюм ва дори воситаларини сақлаб келаётгани фош бўлди.
Бошқа бир ҳолатда эса Мирзо Улуғбек туманида ўтказилган тезкор тадбирда аввалдан кузатувга олинган шахс нотурар жойда яширин цех ташкил этгани фош қилинди.
Бу жойдан дори воситалари тайёрлашда ишлатиладиган салкам ярим тонна оғирликдаги турли хил кукунсимон хом ашё, 180 кг оғирликда ва салкам 3 минг қути таблетка ҳамда капсула кўринишида, 133 дона флаконда қўлбола тарзда ишлаб чиқарилган дори воситалари қонунбузарлардан мусодара қилиб олинган.
Цехда тахминий қиймати 150 минг АҚШ долларини ташкил қилувчи 19 дона ускуна, 21 дона темир қолип, штрих-код чоп этилган 132 тўп ёрлиқлар, шу жумладан, “Нейромидин” ва “Парацетамол” дори воситасига тегишли штрих-код ёрлиқлари, этикеткалар ва қўлланмалар борлиги аниқланган.
Маълумот учун, ушбу ҳолатда олиб қўйилган салкам ярим тонна хом ашёдан дорихоналарда ўртача нархи 10 минг сўмлик 850–900 минг дона “Фаниган” дори воситасини тайёрлаш мумкин бўлган.
Таъкидлаш жоиз, қўлбола усулда тайёрланган дори воситалари саломатликка жиддий зарар етказиб, аллергик реакциялар, заҳарланиш ва оғир асоратларга олиб келади.
Изоҳ (0)