“Толибон” олий етакчиси Ҳайбатуллоҳ Охундзода мамлакатдаги қозиларни халққа зулм қилишни тўхтатишга ва “адолатни” таъминлашга чақирди, деб хабар бермоқда “Дарё”нинг Афғонистондаги мухбири.
Охундзода “зулм ва адолатсизлик” давом этса, бу охир-оқибат ҳукуматнинг қулашига олиб келади, деган фикрда.
“Толибон” вакиллари томонидан эълон қилинган аудиода олий етакчи қозилардан “Исломнинг тўртинчи халифаси Ҳазрати Али каби адолат ўрнатишни” сўраган. Унинг таъкидлашича, фақат адолатгина “ҳукуматнинг омон қолишига устун бўлади, акс ҳолда мамлакатда қотиллик ва қасос бошланиши мумкин”.
“Толибон” етакчисининг ушбу мурожаати ҳаракатнинг ўзи тайинлаган қозиларга қаратилган бўлса-да, “Толибон” кўпинча одамларни судсиз ҳибсга олади, бу эса халқаро инсон ҳуқуқлари қоидаларига зид. “Толибон” тинч аҳолини судсиз ўлдириш ва қамоқхоналарда маҳбусларни қийноқларга солишда бир неча бор айбланган.
Аввалроқ Охундзода амалдорларнинг қариндошларини давлат лавозимига ишга олишини тақиқловчи фармон чиқарган эди. У барча амалдорларга ўғиллари ва маъмуриятда ишлаётган бошқа қариндошларини ишдан бўшатишни буюрган.
Март ойи бошларида Афғонистонда молия вазири ва “Толибон” етакчиси ўртасида зиддият юзага келганди. Молия вазири Ҳидоятуллоҳ Бадрий Охундзоданинг ҳаракатларини очиқдан очиқ танқид қилган. У ўз сўзларини истеъфога чиқишга тайёрлиги билан тасдиқлаганди.
Изоҳ (0)