Hindiston hukumati Birlashgan Millatlar Tashkilotining Jahon oziq-ovqat dasturi bilan kelishuv imzoladi, unga ko‘ra Afg‘onistonga 10 ming tonnaga yaqin bug‘doy jo‘natiladi, deb xabar bermoqda “Daryo”ning Afg‘onistondagi muxbiri.
Hindiston ommaviy axborot vositalarining xabar berishicha, ushbu kelishuv Hindiston Tashqi ishlar vazirligi va BMTning Jahon oziq-ovqat dasturi o‘rtasida Mumbayda imzolangan. BMT dasturi Hindistonni Afg‘oniston aholisining zaif qatlamiga bug‘doyni qisqa fursatda yetkazib berish uchun zarur infratuzilma mavjudligiga ishontirgan.
Chabahor porti orqali Afg‘onistonga yuborilayotgan ushbu bug‘doy BMT dasturi yordamida Afg‘onistondagi muhtojlarga beriladigan beshinchi yordam bo‘ladi.
Afg‘oniston o‘n yildan ortiq vaqtdan beri og‘ir davrni boshdan kechirmoqda. Mamlakatda iqtisodiy va xavfsizlik nuqtai nazaridan ko‘plab muammolar bor. Afg‘onistonliklar ham qonuniy ham noqonuniy yo‘llar bilan Yevropa mamlakatlariga ko‘chib o‘tish uchun mamlakatni tark etishga urinib keladi. Ularning ko‘pchiligi yo‘lda Turkiya va Gretsiya suvlarida halok bo‘layotgani haqida xabarlar beriladi.
Ayni paytda Afg‘onistondagi iqtisodiy vaziyat eng og‘ir ahvolda. BMT Jahon oziq-ovqat dasturi Afg‘onistonda 28 milliondan ortiq odam yegulikka muhtojligini ma’lum qilgan.
Izoh (0)