Лондоннинг ICE биржаси маълумотларига кўра, Европада газ нархи 2021 йил 30 августдан бери биринчи марта 1 000 куб метр учун 600 доллардан пастга тушди. Кунига умумий нархнинг пасайиши 3 фоиздан ортиқ. Бу ҳақда «ТАСС» хабар бермоқда.
Нидерландиядаги TTF марказида февраль фьючерслари нархи 1 000 куб метр учун 599 долларга ёки МВт/соат учун 53,5 еврога тушди.
Газ котировкалари Европадаги қиш учун етарлича илиқ об-ҳаво фонида тушмоқда.
Европа Иттифоқида шамол энергияси ишлаб чиқаришнинг ўртача улуши ой бошидан буён жуда юқори бўлиб, 26 фоиздан ошди. 15 январь куни эса у бутун кузатув вақти бўйича рекордга эришди — 35,4 фоиз.
Бундан ташқари, ЕИ ерости омборларидаги газ захиралари йилнинг шу даври учун тарихий энг юқори даражада. Ҳозирда Европадаги UGS объектлари 81,49 фоизга тўлган (сўнгги 5 йилдаги ўртача кўрсаткичдан 19,32 фоиз пунктга юқори), уларда 88,24 миллиард куб метр газ мавжуд.
2022 йил давомида газ нархи қандай ўзгарди?
Европа Иттифоқи 2022 йилнинг учинчи чорагида газ сотиб олишга рекорд миқдорда 101 миллиард евро сарфлади.
Январь ойи бошида Европа Иттифоқи давлатлари омборлардаги захира газдан фойдаланишни икки баравар оширди.
Лондондаги ICE биржаси маълумотларига кўра, 5 январдаги савдолар бошида Европада газ нархи 2021 йил сентябридан бери илк бор 1 000 куб метр учун 700 доллардан пастга тушган.
2022 йилнинг 22 декабрь куни Европа Кенгаши газ нархининг чегарасини МВт/соат учун 180 евро миқдорида расман тасдиқлади.
У 2023 йил 15 февралдан кучга киради. Ушбу қарор фонида Европада газ нархи 2022 йил 26 октябрдан бери илк бор 1 000 доллардан пастга тушди ва бу жараён давом этди. 4 январь ҳолатига эса у 750 доллардан пастга тушган эди.
Европада газ нархи 2021 йилнинг баҳоридан бери ошиб бораётган эди. Бир йил аввал газ нархи 250-300 доллар эди ва декабрь ойида биринчи марта 2000 доллардан ошди.
2022 йил 7 март куни эса газнинг биржа нархи тарихда биринчи марта минг куб метр учун 3 900 долларгача кўтарилган эди.
Мутахассислар нархларнинг ошишини Осиёда суюлтирилган газга бўлган талаб, йирик етказиб берувчилар томонидан чекланган таъминот ва Европадаги ерости омборлари билан бандлик даражаси пастлиги билан изоҳлаган.
Газ нархи ошишининг қўшимча омили Россиянинг ДХР ва ЛХР мустақиллигини тан олиши, шунингдек, Украинадаги уруш ва ундан кейин Россияга қарши санкциялар жорий этилиши бўлган. Жумладан, Россиядан Германияга ўтадиган «Шимолий оқим 2» газ қувури лойиҳаси музлатиб қўйилгани ҳам бунга сабаб эди.
2022 йил 25 август куни эса Европада газнинг спот нархи март ойи бошидан буён рекорд даражага етган эди — минг куб метр учун 3,5 минг доллар.
Бу даврда ҳам газ нархининг ошиб кетишига асосан иссиқ ҳаво ва қурғоқчилик сабаб бўлган эди. Юқори ҳарорат ортидан дарёлар саёзлаша бошлади ва бу улар орқали кўмир ташиш қийинлашган. Бунинг ортидан электр энергиясини ишлаб чиқариш учун газга бўлган талаб ошиб кетган.
«Газпром» бу қишда Европада газ нархи минг куб метр учун рекорд даражадаги 4 минг доллардан ошишини прогноз қилган эди.
2022 йилнинг 28 августида эса Россия Хавфсизлик кенгаши раисининг ўринбосари Дмитрий Медведев Европада газ нархи 5 000 еврогача ошиб кетишини прогноз қилган эди.
Европада энергия инқирози ҳали якунланмаган бўлса-да, минтақада рецессия кутилмаяпти. Газ нархи эса иссиқ об-ҳаво, яшил энергия ва бошқа сабаблар туфайли тушишда давом этмоқда.
Изоҳ (0)