Londondagi ICE birjasi ma’lumotlariga ko‘ra, 5-yanvardagi savdolar boshida Yevropada gaz narxi 2021-yil sentyabridan beri ilk bor 1 000 kub metr uchun 700 dollardan pastga tushdi. Bu haqda “TASS” xabar bermoqda.
Ma’lumotlarga ko‘ra, kun boshidan buyon narxlarning umumiy pasayishi 2,8 foizdan ortgan.
Gollandiyadagi TTF markazida fevral fyucherslari narxi 1 000 kub metr uchun 696,3 dollarga yoki MVt/soat uchun 63,5 yevroga tushdi.
Yevropada issiq ob-havo sharoitida gaz narxlari pasaymoqda. Yevropa Ittifoqining aksariyat mamlakatlarida havo harorati iqlim ko‘rsatkichlaridan yuqori bo‘lib qolmoqda, bu nafaqat omborlardan gaz olishning pasayishiga, balki ularni to‘ldirish rekord darajaga ko‘tarilishiga olib keldi.
Bundan tashqari, Yevropa Ittifoqining shamol energiyasini ishlab chiqarishdagi ulushi 20 foiz yoki undan yuqori ko‘rsatkich atrofida barqaror bo‘lib qolmoqda. 1-yanvar kuni esa u 34,7 foizlik ko‘rsatkichga erishdi.
20-dekabr kuni energiya resursining birja narxi Urengoy—Pomari—Ujgorod magistral gaz quvuridagi portlash fonida 1 MVt/soat uchun 114,33 yevrogacha ko‘tarildi. Keyinchalik gaz narxi yoz boshidagi darajaga tusha boshladi.
22-dekabr kuni Yevropa Ittifoqi gaz narxining yuqori chegarasini MVt/soat uchun 180 yevro miqdorida tasdiqladi.
Cheklov 2023-yil 15-fevralda kuchga kiradi, Yevropa Komissiyasi chegara haqidagi kelishuvni “energiya ta’minoti xavfsizligi va moliyaviy bozorlar barqarorligini” ta’minlash bilan izohladi.
Izoh (0)