АҚШ ҳукумати ҳали ҳам Украинага қурол-яроғларни улардан Россия ҳудудларига зарбалар беришда фойдаланмаслик шарти билан етказиб бермоқда. Бу ҳақда америкалик шарҳловчи Андреас Клут Bloomberg учун ёзган мақоласида айтиб ўтди.
Шарҳловчининг фикрича, АҚШ ҳукумати Россияга зарбалар берилишига имконият яратиш орқали «қизил чизиқ»ни босиб ўтишни истамайди, чунки бу Россия ҳукуматини ядро қуролидан фойдаланишга гижгижлаши мумкин.
Россия ҳарбий доктринасига мувофиқ, оммавий қирғин қуроли ёки оддий қурол-яроғлардан фойдаланиб мамлакатга нисбатан тажовуз қилинган ёки давлатнинг мавжудлиги хавф остига қўйилган тақдирда, ядро қуроли қўлланилиши мумкин.
Сентябрда Украинанинг АҚШдаги элчиси Оксана Маркова қуроллардан Россияга зарбалар беришда фойдаланиш учун тақиқ фақат HIMARS’га тааллуқли эканини айтганди. The Wall Street Journal газетаси манбаларига кўра, АҚШ Украинага HIMARS’ларни жўнатишдан аввал уларнинг ўқ узиш масофасини қисқартирган ва шу билан Украина ҳарбийларининг Россия ҳудудига зарба бериш эҳтимолига тўсқинлик қилмоқчи бўлган.
Декабрда Британиянинг The Times газетаси ўз манбаларига таяниб АҚШ Россия ҳудудига зарбалар бўйича Украинага нисбатан талабларга ёндашувини ўзгартиргани ҳақида ёзганди. Гўёки, энди Вашингтон фақат россиялик оилаларга ҳужум қилмаслик ва муайян шахсларни йўқ қилмасликни сўрамоқда.
Аввалроқ Украина АҚШдан ATACMS ракеталарини сўрагани, бироқ рад жавобини олгани хабар берилганди. АҚШ президенти Жо Байден билан учрашувда Украина президенти Владимир Зеленский Киевга узоқ масофали ATACMS ракеталарини етказиб бериш масаласини кўтарган. ОАВлар шундай қурол етказиш ҳақидаги келишувлар Зеленскийнинг Вашингтонга ташрифидан кўзланган асосий мақсад бўлгани ҳақида ёзганди. АҚШ бундай қурол вазият кескинлашишига сабаб бўлиши мумкин, деган позициясини сақлаб қолган ва фикрини ўзгартирмаган.
Мавзуга доир:
Изоҳ (0)