Россия ўз армияси томонидан Украинада фаол қўлланилаётган Эрон камикадзе-дронларини ишлаб чиқаришни бошламоқчи. Бу ҳақда Украина Миллий хавфсизлик ва мудофаа кенгаши котиби Алексей Данилов телемарафон эфирида маълум қилди.
«Улар бу ишни амалга оширмоқчи бўлаётган шаҳарлардан бири — Толятти, бошқа шаҳарлар ҳам бор. Бизнинг разведкамиз кўплаб масалалар бўйича бекам-у кўст ишлайди ва биз улар қандай қадамларни қўйишини олдиндан билиб турамиз», — деди Данилов.
Шу билан бирга, У МХМК котиби қайд этишича, Россия зарур таркибий қисмлар танқислиги шароитида дронлар ишлаб чиқаришни қай тарзда йўлга қўймоқчилигидан у бехабар. «Улар ўз дронларини нимадан йиғиши катта савол бўлиб турибди», — дея қўшиб қўйди Данилов.
Россия армияси Украинада Эронда ишлаб чиқарилган Shahed-131/136 камикадзе-дронларини фаол равишда қўлламоқда, уларни россияликлар «Геран-1» ва «Геран-2» деб қайта номлаб олган.
Россиянинг ўз ҳудудида Эрон дронларини ишлаб чиқишни йўлга қўйиш режалари ҳақида аввалроқ The Washington Post газетаси хабар берганди. Нашр маълумотларига кўра, Россия ва Эрон расмий шахслари ишлаб чиқариш бўйича 2022 йил ноябрида келишувга эришган.
2023 йил январида CNN телеканали Shahed-136 нинг 52 та деталидан 40 таси Американинг 13 хил компанияси томонидан тайёрланганини маълум қилганди. Қолган 12 та деталь Канада, Швейцария, Япония, Тайван ва Хитойда ишлаб чиқарилган.
Изоҳ (0)