Бразилия полицияси собиқ президент Жаир Болсонарунинг тарафдорлари томонидан намойишлар билан эгаллаб олинган Планалто президент саройи, шунингдек, Миллий Конгресс ва Олий суд биноларини озод қилди, деб хабар бермоқда CNN Brasil.
Тартибсизликлардан кейин 400 дан ортиқ одам ҳибсга олинган. «Улар қилган жиноятлари учун жавоб беради», — деб ваъда қилди Бразилия федерал округи губернатори Ибанез Роча. Рочанинг ўзи «ҳаракатсизлик ва бепарволик» учун Олий суд қарори билан 90 кунга лавозимидан четлатилди.
Амалдаги давлат раҳбари Луис Инасиу Лула да Сильванинг айтишича, тартибсизлик иштирокчиларининг барчаси «аниқланади ва жазога тортилади». Полиция сарой биноларини текшириб чиққанидан сўнг Лула да Сильва рафиқаси билан ишчи қароргоҳига ташриф буюрди, деб хабар бермоқда Globo.
Тартибсизликлар бошланган пайтда да Сильва пойтахтда бўлмаган, у сув тошқини оқибатларини текшириш учун Сан-Паулу штатига кетган эди. Президент Бразилияда январь ойи охиригача фавқулодда ҳолат эълон қилди.
Намойишларда асосан, ўта ўнгчи Болснару тарафдорлари иштирок этган, улар собиқ президентнинг сайловлардаги мағлубиятини тан олишдан бош тортган (Болсонару 49,2 фоиз, Лула да Сильва эса 50,8 фоиз овоз олганди). Мамлакат адлия вазири Флавио Дино ҳужумчиларнинг ҳаракатларини «терроризм» деб атади ва уларни давлат тўнтаришига уринишда айблади.
Ўз навбатида, Болсонару содир бўлаётган воқеаларни қоралаб, «ўғирлик ва жамоат биноларига кириш белгиланган тартибни бузади», деди. Собиқ президент декабрь ойи охирида, муддати тугашига икки кун қолганда мамлакатни тарк этганди. Ҳозир у Американинг Флорида штатида, Орландода, деб ёзади The New York Times.
Лулани дунё етакчилари, жумладан, Франция ва АҚШ президентлари Эммануэль Макрон ва Жо Байден ҳамда Италия бош вазири Жорж Мелони қўллаб-қувватлаган. БМТ Бош котиби Антониу Гутерриш «Бразилия демократик институтларига қилинган ҳужумни» қоралаган бўлса, Европа дипломатияси раҳбари Жозеп Боррел «Бразилия демократияси зўравонлик ва экстремизмни енгишига» умид билдирган.
Изоҳ (0)