Грециянинг ташқи ишлар ва мудофаа бўйича ҳукумат кенгаши Эврос дарёси бўйлаб Туркия билан қуруқликдаги чегаранинг бутун узунлиги бўйлаб девор қуришга қарор қилди. Бу ҳақда Daily Sabah хабар берди.

Фуқаро муҳофазаси вазири Такис Теодорикакоснинг сўзларига кўра, тўсиқнинг дастлабки 35 километрини қуриш зудлик билан бошланади. Унинг нархи 100 миллион еврога баҳоланмоқда.

«Бизнинг қўшниларимиз бахтсиз одамларни эксплуатация қилишнинг давом этишига ўрин йўқлигини жуда яхши билади. Грециянинг Эвросдаги чегараларидан ўтиб бўлмайди ва бунга ҳеч қандай шубҳа йўқ», — деб тушунтирди Теодорикакос.

Ҳозирда Греция фуқароларини ҳимоя қилиш вазирлиги лойиҳани мамлакат Молия вазирлиги расмий тасдиқлашини кутмоқда. Шундан кейин тендер эълон қилинади.

«2022 йилда Греция полицияси 256 минг ноқонуний муҳожирнинг мамлакатга киришига тўсқинлик қилган ва одам савдоси билан шуғулланган 1300 кишини ҳибсга олган», — деди у ва Туркия ноқонуний миграция ташаббускори эканини таъкидлади.

Греция 1821 йилда Усмонли империясидан мустақилликка эришганидан бери Греция—Туркия муносабатлари ўзаро адоват ва қисқа муддатли ярашув даврлари билан ажралиб туради. Туркия ва Греция ўртасидаги зиддият баҳорда Эгей денгизи шарқий қисмидаги ороллар мақоми борасидаги келишмовчиликлар фонида авж олди. Ороллар 1923 йил Лозанна шартномасидан кейин Грецияга ўтган.

Июнь ойида Туркия президенти Ражаб Тоййиб Эрдўғон Греция оролларда ҳарбий машғулотлар ўтказаётганини айтган. Греция ўз оролларининг суверенитетига таҳдидларга жавобан, чегараларни қайта кўриб чиқишга рози бўлмаслигини таъкидлаган.