Германия Ташқи ишлар вазирлиги Польша дипломатик миссиясининг Иккинчи жаҳон урушидаги йўқотишлар учун товон тўлаш талаби билдирилган нотасини муҳокама қилишдан бош тортди. Дипломатик миссия сайтидаги баёнотга кўра, 3 январь куни Польша ТИВ Германиядан шундай жавоб нотасини олган.
«Германия ҳукуматининг фикрича, ҳарбий йўқотишларни қоплаш ва товон тўлаш масаласи ёпиқлигича қолмоқда. Германия ҳукумати бу борада музокаралар олиб бориш ниятида эмас», — дейилади баёнотда.
Аммо, Польша Ташқи ишлар вазирлиги маълумотларига кўра, Польша ҳукумати «1939—1945 йиллардаги Германия агрессияси ва босқинчилиги оқибатида юзага келган дебиторлик қарзларини ҳал қилиш» бўйича ҳаракатларни давом эттиради.
Польша ТИВнинг яна бир баёнотида Варшава Бирлашган Миллатлар Ташкилотидан бу борада ёрдам сўрагани маълум қилинди. «Польша Германия ҳукумати Польша талабларига муносиб жавоб беради деб умид қилмоқда. 1973 йилдан бери БМТ аъзоси бўлган Германия федератив республикаси Польшанинг Германиядан кўрган йўқотишларини қоплаш учун тизимли чоралар кўриши керак. Уруш тугаганидан кейин ҳал этилмай қолган муаммога халқаро ҳамжамиятнинг эътиборини қаратиш учун БМТда мунозара ўтказилишини интизорлик билан кутамиз», — дейилади хабарда.
Германия ҳукумати Иккинчи жаҳон уруши учун жавобгарликни тан олганига қарамай, 1953 йилги Польша Сейми резолюциясига ишора қилиб, Польшага товон пули тўлашни бир неча бор рад этган. Ўша ҳужжатда Варшава ГФР етказилган зарарни қоплаш бўйича барча мажбуриятларини бажарганини таъкидлаган эди. Бундан ташқари, 1991 йилда Берлин яхши қўшничилик шартномаси бўйича яна 1,3 миллиард евро тўлаган.
Польша 2022 йилнинг октябрь ойи бошида Германияга товон тўлаш бўйича нота юборган эди. Ундан аввал «Қонун ва адолат» партияси раҳбари Ярослав Качинский Варшава Иккинчи жаҳон урушида етказилган зарар учун Берлиндан 6,2 триллион злотий (тахминан 1,3 триллион доллар) товон пули талаб қилишини айтганди. Унинг сўзларига кўра, бу миқдор «энг консерватив усул» билан ҳисобланган ва асл сумма ундан ҳам кўпроқ бўлиши мумкин.
Изоҳ (0)