АҚШ ва Жанубий Корея КХДР ядро қуролидан фойдаланишга қарор қилган тақдирда, унга нисбатан қўлланиладиган жавоб чораларини ишлаб чиқмоқда. Бу ҳақда Оқ уй матбуот котиби Карин Жан-Пьер журналистлар учун кундалик брифингда маълум қилди.
Унинг қайд этишича, томонлар қўшма ядровий машғулотларни муҳокама қилгани йўқ, чунки Корея Республикаси ядро қуролига эга бўлмаган мамлакат ҳисобланади.
Шу билан бирга, унинг таъкидлашича, 2022 йил ноябрида Камбоджадаги учрашувдан кейин АҚШ президенти Жо Байден ва Жанубий Корея президенти Юн Сок Ёл ўз жамоаларига бир қатор сценарийларга, шу жумладан, Пхеньян томонидан ядро қуроли қўлланилишига қарши самарали, мувофиқлаштирилган жавоб ҳаракатини режалаштиришни топширган.
Унинг сўзларига кўра, икки мамлакат жамоалари айнан шу масала устида иш олиб бормоқда. АҚШ Жанубий Корея билан альянсга тўлиқ содиқ, унга ўз куч ва воситаларининг бутун спектрини тақдим этиб, унга тийиб туришда кўмак беришга тайёр, дея қўшиб қўйди у.
Аввалроқ Жанубий Корея президенти Юн Сок Ёл Chosun Ilbo газетасига берган интервьюсида Сеул ва Вашингтон Америка ядровий қуроллари иштирокида қўшма машғулотлар ўтказиш имкониятини муҳокама қилаётганини айтганди.
Бироқ АҚШ президенти Жо Байден Жанубий Корея ҳукумати билан қўшма ядровий машғулотларни муҳокама қилмаётганини айтди. Жанубий Корея ҳукумати билан қўшма машғулотлар масаласини муҳокама қилган-қилмагани ҳақидаги саволга жавоб бераётиб, у: «Йўқ», — деди.
31 декабрь куни КХДР Меҳнат партияси ялпи мажлисида Ким Чен Ин мамлакат ядровий арсеналини кучайтириш зарурияти ошганини, чунки Жанубий Корея «шак-шубҳасиз душман»га айланганини маълум қилди. Унинг баёнотига жавобан Жанубий Корея ядровий зарба амалга оширилган тақдирда, Ким Чен Ин режимига нуқта қўйилиши ҳақида огоҳлантирди.
Изоҳ (0)