1 январь куни Германияда ҳаво ҳарорати 16 даража илиқ бўлди, бу январь учун рекорд кўрсаткич. Польша, Швейцария ҳамда Франциянинг жанубий ва шарқий қисмида эса 19 даража илиқ ҳаво қайд этилди. Бу ҳақда Германиянинг Deutscher Wetterdienst метеохизмати хабар берди.
Варшава учун бундан аввалги рекорд беш даража пастроқ бўлганди, дейди синоптиклар.
Илиқ ҳаво 1 январга ўтар кечаси Чехияда ҳам кузатилди. Мамлакат метеохизмати хабар беришича, тунда ҳаво 1925 йилдан буён бутун кузатувлар тарихидаги рекорд кўрсаткичларгача исиган, энг баланд — 17,6 даража илиқ ҳарорат — Прагада ва Марказий Богемия ўлкасида қайд этилган.
Bloomberg ёзишича, илиқ ҳаво Европада табиий газ истеъмолини ва унинг нархини пасайтириш имконини берган, кўпчилик ҳудудларда эса ҳаво совиши кутилмаяпти, бу Россиядан ёнилғи етказиб берилиши қисқариши фонида электр энергиясининг узиб қўйилиши хавфини камайтиради. Бундан ташқари, Европанинг баъзи ҳудудларида шамол тезлиги ошган. Bloomberg ҳисоб-китобларига кўра, бунинг натижасида 4, январь, чоршанба куни Германия шамол энергетикасидан деярли рекорд ҳажмда электр энергияси олади.
Яқин ҳафталарда Европа ва АҚШнинг катта қисмида ҳаво ҳарорати меъёрдан юқори бўлади. Шунингдек, Хитойда ҳам январь ўрталаригача мўътадил об-ҳаво сақланиб қолади.
Аввалроқ иқлимшунослар кириб келган 2023 йил 2022 йилдан илиқроқ бўлиши мумкинлигини прогноз қилганди. Синоптик айтишича, келаси ўн йилликда, шу жумладан, 2023 йилда ҳам, экстремал об-ҳаво ҳодисалари кўпаяди. Унинг сўзларига кўра, об-ҳаво аномалиялари аввалги ўн йилликка қараганда анча кўпроқ бўлади.
Изоҳ (0)