Норвегия 2023 йилнинг баҳоригача Украинани зарур газ билан таъминлашга тайёр. Бу ҳақда 3 январь куни Украина президенти Владимир Зеленский украиналикларга кечки мурожаатида маълум қилди.
Зеленский Норвегиянинг Европани ҳимоя қилишдаги роли тарихий бўлиши мумкинлигини таъкидлади.
«Қабул қилинган ва ҳали яна тайёрланаётган жуда кучли қарорлар учун Норвегияга раҳмат. Қуролли ёрдамни ҳам назарда тутяпман. Агар биз ҳозир айтаётган барча нарсани амалга оширсак, Норвегиянинг роли Европани ҳимоя қилишда чинакам тарихий аҳамиятга эга бўлиши мумкин», — деди Зеленский.
Украина президентининг қўшимча қилишича, бу Украина энергетика тизимини қўллаб-қувватлашга ҳам тегишли.
«Хусусан, Норвегияга Украинани қиш учун зарур миқдорда газ билан таъминлашда ёрдам беришга тайёрлиги учун миннатдорлик билдираман», — деди президент.
3 январь куни Зеленский Норвегия бош вазири Гар Стере билан музокаралар ўтказган ва унга қишки газни молиялаштираётгани учун миннатдорлик билдирган.
Ноябрь ойида Норвегия Украинага газ учун қарийб 200 миллион доллар ажратгани ҳақида хабар берилган эди.
Изоҳ (0)