БМТ ҳозирча Украина ташқи ишлар вазири Дмитрий Кулеба томонидан таклиф қилинган Украина бўйича тинчлик саммитини ташкиллаштириш билан шуғулланмаяпти. Бу ҳақда ташкилот матбуот котиби ўринбосари Фархан Хак брифингда маълум қилди.
«Бу БМТ ташкиллаштирадиган нарса эмас… ушбу босқичда у ҳақда эълон қилинадиган ҳеч нарса йўқ. Агар қандайдир ўзгариш бўлса, албатта хабардор қиламиз», — деди у Кулебанинг таклифи ҳақидаги саволга жавобан.
Декабрь охирида Украина ташқи ишлар вазири Киев февраль ойида БМТда бош котиб Антониу Гутерриш воситачилигида тинчлик саммитини ўтказишга умид қилаётганини айтганди. «БМТ бундай саммитни ўтказиш учун энг муносиб майдон бўлган бўларди, чунки бу муайян мамлакатга ёрдам беришни англатмайди. Гап ҳаммани жалб қилиш ҳақида бормоқда», — деганди Кулеба.
Унинг фикрича, Россия ҳукумати баёнотларига қарамасдан, Москва музокараларга тайёр эмас. Россия президенти Владимир Путин аввалроқ мулоқотдан Киев бош тортаётгани, Россия эса бу жараённинг барча иштирокчилари билан келишиб олишга тайёрлигини айтганди. Путиннинг сўзларига кўра, зиддият иштирокчиларининг барчаси доим эртами, кечми музокаралар столи атрофида йиғилиб, келишиб олади, «бизга қарши турганлар» бу фактни қанчалик тез англаса, шунчалик яхши бўлади. Россиянинг мақсади, деди у, «бу урушни тугатиш»дан иборат, Москва бундан кейин ҳам шунга интилади.
Ноябрь ўрталарида Зеленский G20 саммитида видеомурожаат билан чиқиб, ўзининг ўнта шартдан иборат бўлган «тинчлик формуласи»ни таклиф этган эди. Ушбу шартлар радиациявий ва ядровий хавфсизлик; озиқ-овқат хавфсизлиги; энергетика хавфсизлиги; барча асирлар ва депортация қилинганларнинг озод этилиши; БМТ уставининг бажарилиши ҳамда Украина ҳудудий яхлитлиги ва дунё тартибининг қайта тикланиши; Россия қўшинларининг олиб кетилиши ва жанговар ҳаракатларнинг тўхтатилиши; адолатнинг қайтарилиши; экоцид (флора ва фаунанинг йўқ қилиниши)га қарши кураш; эскалацияга йўл қўймаслик; низо якунланганининг мустаҳкамланишини ўз ичига олади.
Аммо Россия ҳукумати Киев билан Украина президенти Владимир Зеленский томонидан таклиф қилинган «тинчлик формуласи» низомлари асосида мулоқот олиб бормоқчи эмас. Украина раҳбариятининг тинчлик бўйича режаси концепциясини Россия ташқи ишлар вазири Сергей Лавров хомхаёл деб тавсифлади.
Мавзуга доир:
Изоҳ (0)