Янги йил кечаси Украинанинг Донецк вилояти Макеевка шаҳридаги касб-ҳунар билим юрти биноси HIMARS тизимлари ёрдамида ўққа тутилиши оқибатида 89 нафар россиялик ҳарбий хизматчи ҳалок бўлди, дея хабар бермоқда Россия Мудофаа вазирлиги. Аввалроқ 63 нафар қурбон ҳақида маълум қилинган эди.
Ҳодиса сабаби сифатида идора ҳарбийлар томонидан мобил телефонлар қўлланилганини айтиб ўтди. Мудофаа вазирлиги Россия аскарлари ҳалок бўлишида айбдор бўлган мансабдор шахсларни жавобгарликка тортишга ваъда берди.
Россия қуролли кучлари ҳарбий-сиёсий бош бошқармаси бошлиғи биринчи ўринбосари генерал-лейтенант Сергей Севрюков брифингда маълум қилишича, иккита HIMARS снарядларини ҳаво ҳужумига қарши мудофаа тизимлари тутиб қолган, тўртта снарядни ушлаб қолишолмаган, улар билим юрти биносига бориб теккан.
Натижада, генерал-лейтенант сўзларига кўра, бинонинг бостирмалари қулаб тушган. Сергей Севрюковнинг айтишича, жабрланувчиларни қутқариш учун «мумкин бўлган барча чоралар» кўрилган. Мудофаа вазирлиги қайд этишича, Украина қўшинлари Макеевкага зарба беришда фойдаланилган HIMARS пуск қурилмаси жавоб ўти билан йўқ қилинган.
1 январь куни ДХР ахборот вазири ўринбосари Даниил Безсонов Янгил йил кечаси Украина қуролли кучлари сафарбар этилганлар байрам дастурхони атрофида ўтирган вақтда билим юрти биносига HIMARS орқали ракеталар билан зарба берганини маълум қилганди. Эртаси куни бу маълумот Россия Мудофаа вазирлиги томонидан тасдиқланди.
Аввалроқ АҚШнинг Урушни тадқиқ этиш институти (ISW) Макеевка шаҳридаги Россия базасига 31 декабрь куни уюштирилган зарба Россия расмийларининг кескин танқидига сабаб бўлгани, бу эса президент Владимир Путиннинг обрўсига путур етказиши мумкинлиги ҳақида ёзганди.
Изоҳ (0)