Британия ҳукумати бир неча ҳафта ичида Эрон Ислом инқилоби қўриқчилари корпусини террорчи ташкилот деб эълон қилмоқчи. Бу ҳақда The Telegraph хабар берди.
Бу қарорни Британия Ички ишлар вазирлиги раҳбари Суэлла Браверман ва унинг ўринбосари, хавфсизлик вазири Том Тугендхат қўллаб-қувватламоқда. Агар Эрон қўриқчилар корпуси террорчи ташкилотлар рўйхатига киритилган бўлса, корпусга аъзолик, унинг рамзларини тақиш тақиқланади. Унинг фаолиятини қўллаб-қувватлаганлар эса жиноий жавобгарликка тортилади.
2019 йилда АҚШ Эрон Ислом инқилоби қўриқчилар корпусини террорчи ташкилот деб тан олган ва унга қарши санкциялар киритди. АҚШ президенти Жо Байден санкцияларни олиб ташламоқчи эмас.
Эрон ҳукумати 2022 йилда ядровий келишув доирасидаги санкцияларни бекор қилишни талаб қилган, бироқ кейинчалик бу талабдан воз кечган. Декабрь ойи охирида Эронда етти киши Британия разведка хизматлари билан алоқадорликда айбланиб ҳибсга олинган. Гуруҳ Эронда сентябрь ойида нотўғри ҳижоб кийганликда айбланиб, полиция ўринбосари томонидан ҳибсга олинган 22 ёшли Маҳса Аминий ўлими туфайли бошланган тартибсизликлар чоғида қўпорувчилик фаолиятига раҳбарлик қилгани айтилади.
Маълумот ўрнида, Ислом инқилоби қўриқчилари корпуси 1979 йилда ташкил топган Эрон ҳарбий-сиёсий тузилмаси ҳисобланади.
Изоҳ (0)