Zelenskiy Ukrainada “tinchlik o‘rnatilishini tezlashtirish” uchun uchta qadamni taklif qildi

Ukraina prezidenti Vladimir Zelenskiy G7 mamlakatlari yetakchialriga murojaatida “Ukrainada tinchlik o‘rnatilishini tezlashtirish” bo‘yicha o‘z rejasini taklif qildi, deb yozadi “Kommersant”. U Kiyevga yangi turdagi qurol-yarog‘ yetkazib berishni, energetik va moliyaviy ko‘makni hamda Ukraina tomonidan ilgari surilgan 10 bandli “tinchlik formulasi”dan iborat bo‘lgan “yangi diplomatiya”ni o‘z ichiga oladi.

“Erishilgan hamjihatlikni saqlab qolishni so‘rayman, Rossiya tajovuzini davom ettiryapti, demak, Ukrainani qo‘llab-quvvatlash ham davom etishi kerak. Kelasi yilda ham — xuddi shu yilgidek. Ammo bundan tashqari, biz anchadan buyon kutilayotgan —tinchlik o‘rnatilishini tezlashtiradigan qadamlarni ham tashlashimiz kerak”, — dedi Zelenskiy. Videomurojaat Ukraina prezidenti saytiga joylandi.

Zelenskiyning “tinchlik o‘rnatilishini tezlashtirish” uchun rejasi quyidagicha:

• Birinchi qadam — “yangi kuch”. Ukraina prezidenti aytishicha, Rossiya artilleriya va raketalar bo‘yicha ustunlikni saqlamoqda. Shu munosabat bilan Kiyev tanklar, srtilleriya, snaryadlar, shu jumladan, uzoq masofali raketalar yetkazib berilishini so‘ramoqda.
• Ikkinchi qadam — “yangicha mustahkamlik”. U “energetik, moliyaviy va ijtimoiy barqarorlik”ni saqlab qolishni o‘z ichiga oladi. Kiyev ittifoqdoshlarini energiye ta’minotidagi muammolar tufayli, gaz yetkazib berishni oshirishga chaqirmoqda. Gap 2 milliard kubometr gaz haqida bormoqda. Shuningdek, Ukraina prezidenti o‘z mamlakatini qayta tiklanishda faolroq qo‘llab-quvvatlashga chaqirdi.
• Uchinchi qadam — “yangi diplomatiya”. Vladimir Zelenskiy “barcha odamlarimiz va hududlarimizning ozod etilishini tezlashtirish uchun diplomatiyadan foydalanish imkoniyati”ni his qilayotganini aytdi. U o‘zining “tinchlik formulasi”ni amalga oshirish bo‘yicha chora-tadbirlarni belgilab olish uchun Global Peace Formula Summit maxsus sammitini tashkillashtirishni taklif qildi. U 10 ta banddan iborat bo‘lib, Rossiya qo‘shinlarining olib ketilishi va Ukraina hududiy yaxlitligining qayta tiklanishini ham o‘z ichiga oladi.