Қашқадарёлик тадбиркор 1,2 млрд сўмга 4 та тез ёрдам машинасини сотиб олиб, энг чекка қишлоқ аҳолисига совға қилди

Қашқадарёлик тадбиркор Нурбек Эргашев вилоятнинг Касби туманидаги энг чекка ҳудудлар — «Ғалаба», «Мирзо Улуғбек», «Талишбе» ва «Темур Малик» аҳолисига 4 та тез тиббий ёрдам автомобилларини совға қилди. Бу ҳақда жамоатчиликка вилоят ҳокими хабар берган.

Таъкидланишича, вилоят ҳокими Муроджон Азимов иштирокидаги тадбирда махсус жиҳозланган тез тиббий ёрдам автомобиллари ҳудуддаги тез ёрдам бўлимларига топширилган.

Саховатли тадбиркоримиз Нурбек Эргашев президентимизнинг тадбиркорларга яратиб бераётган имкониятларини ҳис қилиб, давлатимиз раҳбарининг чақириқларига лаббай деб жавоб берди ва Касби тумани аҳолиси учун 4 та замонавий жиҳозланган махсус тез тиббий ёрдам автомобилларини совға қилди. Тадбиркор бу автомобилларни ўз ҳисобидан 1 миллиард 200 миллион сўмга харид қилиб, халққа жуда катта саховатпешалик қилди. Бугун шу автомобиллар туманнинг тўртта ҳудудидаги аҳволига беминнат хизмат кўрсатади. Бунинг учун тадбиркорга Қашқадарё халқи, вилоят ҳокимлиги ва жамоатчилик номидан миннатдорчилигимизни билдирамиз, — деди вилоят ҳокими Муроджон Азимов.

Маълум бўлишича, мазкур тадбирга тадбиркор билан ҳамкорликда ишловчи фермерлар ҳам таклиф этилган бўлиб, тадбиркор ҳамкор фермерларни ҳам Янги йил байрами билан қутлаб, уларга совға-салом улашган.

Муҳтарам президентимиз кўп маротаба тадбиркорга имконият яратиб берса, у халқни боқишини, давлатга катта даромад келтиришларини таъкидларди. Биз бугун шуни ўзимизда, туманимизда кўрдик ва гувоҳи бўлдик. Тадбиркор Нурбек Эргашевга имконият яратиб берилганидан сўнг у туман аҳлидан ёрдамини аямай, энг чекка ва оғир аҳволдаги қишлоқ аҳолиси учун ўз ҳисобидан тез тиббий ёрдам автомобилларини топширди. Тадбиркор таъсисчилигидаги Naxshab tех group масъулияти чекланган жамияти Касби туманида 3346 гектар ер майдонида 150 та фермер хўжаликлари билан фьючерс шартномаси асосида 11,5 минг тонна ҳосил ўрнига 15,4 минг тонна пахта хом ашёсини етиштирилиб, режани ортиғи билан бажарди. Шахсан ҳоким сифатида бундан хурсандман ва фаолиятим давомида барча тадбиркорни қўллаб-қувватлашга тайёрман, — дейди Касби тумани ҳокими Тўхтамурод Мейлиев.

Тадбиркорга яқин манбанинг «Дарё» мухбирига қўшимча қилишича, корхона йил якунида юқори меҳнат унумдорлигига эришган 24 нафар ходимларининг мароқли дам олиши учун уларни Миср давлатининг «Шарм аш-шайх» дам олиш масканига йўлланма билан тақдирлаган.

Маълум бўлишича, Sulton tex group масъулияти чекланган жамияти 2011 йилда ташкил этилган бўлиб, 2018 йилдан бошлаб тўқимачилик саноати маҳсулотлари ишлаб чиқариш бошланган. Корхона томонидан пахта хом-ашёсини етиштиришдан бошлаб, уни чуқур қайта ишлаш орқали тайёр маҳсулот ишлаб чиқаришгача бўлган барча жараёнларни қамраб олган ўзаро бир-бирига боғлиқ, 87,3 миллион доллар қийматидаги 3945 иш ўринли 15 та йирик лойиҳалар амалга оширилмоқда.

Бугунги кунга қадар 59,8 миллион доллар миқдоридаги 11 та лойиҳа амалга оширилган бўлиб, 2745 та иш ўринлари яратилган. 2023—2025 йиллар давомида 27,5 миллион доллар миқдоридаги яна 4 та лойиҳа ишга туширилиб, 1200 та иш ўринлари яратилади. Корхона томонидан жорий йилнинг 11 ойи давомида 34 миллион доллар миқдорида экспорт амалга оширилиб, йил якунига қадар 40 миллион долларига етказилади. 2023 йилда экспорт ҳажми 100 миллион долларига етказилиши режалаштирилган, — дейди корхона масъули.

Тадбиркорга яқин манбанинг қўшимча қилишича, корхона масъуллари келажакда вилоятда оналар ва болалар саломатлигини қўллаб-қувватлаш учун 200 ўринли замонавий Перинатал марказини ҳам қуриб, вилоят аҳлига хайрия қилишни ният қилган.