Украина Европа Иттифоқига кириш бўйича музокараларни бошлаш учун зарур бўлган оммавий ахборот воситалари тўғрисидаги қонунни қабул қилди.
Олий Рада ОАВ тўғрисидаги қонунни иккинчи, якуний ўқишда қабул қилган. Унга 299 нафар депутат овоз берган, икки нафари бетараф қолган, ҳеч ким қарши овоз бермаган.
Таъкидланишича, яна 30 нафар депутат овоз бермаган. Янги қонун Миллий кенгашга телерадио ва радиоэшиттириш бўйича кўпроқ ваколатлар беради. Шундай қилиб, Миллий кенгаш рўйхатдан ўтмаган оммавий ахборот воситаларини суд қарорисиз вақтинча, икки ҳафтага блоклаш ҳуқуқига эга бўлди.
«Тўлиқ блокировка қилиш фақат суд қарори билан амалга ошади», — дейди Раданинг гуманитар ва ахборот сиёсати қўмитаси раҳбари ўринбосари Евгения Кравчук.
Европа Иттифоқига қўшилиш бўйича музокараларни бошлаш учун Украина Европа комиссияси томонидан белгиланган бир қатор мезонларга, жумладан, оммавий ахборот воситаларини тартибга солиш талабларига жавоб бериши керак.
Эслатиб ўтамиз, Зеленский 12 декабрь куни Парижда «Украина халқи билан бирдамлик» халқаро анжуманида йиғилган Европа етакчиларига видеомурожаат қилганди. Президент уларга олтита муаммони айтиб, уни ҳал қилишда ёрдам сўраганди.
Изоҳ (0)