«Гавайининг сўнгги маликаси» 97 ёшида вафот этди. Унинг бойлиги 215 млн долларни ташкил қилган

Гавайининг сўнгги маликаси сифатида танилган Абигайл Киноики Кекаулике Кавананакоа 97 ёшида вафот этди. Бу ҳақда BBC хабар берди.

Марҳума XIX асрда Гавайи қироллигини бошқарган монархиянинг охирги вакили ҳисобланган. Абигайл Кавананакоанинг бойлиги 215 миллион долларни ташкил қилган. Малика расмий унвонга эга эмас эди, лекин Гавайи оролларда монархия рамзи ҳисобланган ва маҳаллий инфратузилмани ривожлантириш учун кўп ишлар қилган. У 11 декабрь, якшанба куни вафот этган.

Абигайл Кавананакоанинг катта бобоси, ирландиялик тадбиркор Жеймс Кемпбелл Гавайи ороллардаги энг йирик ер эгаларидан бири бўлиб, ўз бойлигини қамиш шакар ишлаб чиқаришдан орттирган. Унинг қизи Абигайл Ваҳиикааҳуула Кемпбелл Гавайи тахтининг вориси Дэвид Кавананакоага турмушга чиққан. Якшанба куни вафот этган Абигайл Кавананакоа унинг набираси бўлади. Бу эса уни монархия сулоласининг меросхўри деб ҳисоблашга асосдир.

Малика хайрия ишларида фаол иштирок этган, хусусан, Гавайининг туб аҳолиси учун мактаблар очилишини қўллаб-қувватлаган. Шу билан бирга, у оролларда темир йўл ва улкан телескоп қуриш лойиҳасига қарши чиққан.

У, шунингдек, АҚШдаги ягона қироллик қароргоҳи бўлган Иолани саройини таъмирлаш учун пул хайрия қилган.

Гавайи қироллиги XIX асрда 1810 йилдан 1893 йилгача давом этган. Фитна натижасида монархия ағдарилган, шундан сўнг ороллар республика бошқарув шаклига ўтган.

Мавзуга доир: Дунёдаги энг кекса бошланғич мактаб ўқувчиси 99 ёшида вафот этди (фото)