Исроилнинг Тель-Авив шаҳрида ўзбекистонлик 37 ёшли энага 83 ёшли аёлга зўравонлик қилганликда айбланиб қўлга олинди. Бу ҳақда маҳаллий Kikar нашри хабар берди.
Тергов маълумотига кўра, энага хонани тозалашга кетганида қарияни омборхонага қулфлаб қўйган. Ўзбекистонлик гумонланувчи кекса аёлни юзи ва танасида кўкаришлар борлиги сабабли калтаклагани тахмин қилинмоқда.
Гумонланувчини ҳибсда сақлаш муддати суд томонидан вақти-вақти билан узайтирилган. Ҳозирда тергов ниҳоясига етган, прокурор унга нисбатан айблов хулосасини тақдим қилмоқчи. Суд жараёни тугагунига қадар аёл ҳибсда сақланади.
Маълумот ўрнида, ноябрь ойида Қозоғистонда ўзбекистонлик фуқаролар ҳиндистонлик эркакни ўғирлаб кетганди. Ҳиндистон фуқароси озод қилинганидан сўнг, ҳолат юзасидан Қарағанда полициясига мурожаат қилган. 27 ёшли жабрланувчи номаълум шахслар уни мажбуран машинага ўтқазиб, Остона шаҳрига олиб кетишганини айтган. Пойтахтда ҳиндистонлик эркак квартирада ушлаб турилган ва зўравонлик билан таҳдид қилиниб, ундан 200 минг доллар талаб қилинган.
Мавзуга доир: Мексикада гаровда ушланган етти нафар ўзбекистонлик қутқарилди (фото)
Изоҳ (0)