Зеленский Европарламент Россияни «терроризм ҳомийси» деб эълон қилганига муносабат билдирди

Украина президенти Владимир Зеленский Европарламент Россияни «терроризм ҳомийси» деб эълон қилганига ва Россиядан 23 ноябрь куни 67 та ракета учирилганига муносабат билдирди.

«Бугун (23 ноябрь) Европарламент Россияни террорчи давлат деб тан олди. Ниҳоят, барча европалик парламентарийларга раҳмат. Кейин эса Россия бизнинг инфратузилмамизга, энергиямизга, оддий одамларга 67 та ракета учириш орқали буларнинг барчаси ҳақиқат эканини исботлади. Оқибати аянчли, жумладан ярадорлар кўп, ўлганлар бор», — деди Украина президенти.

Украинанинг қатор вилоятлари ва Киев шаҳри ракета зарбаларига учрагач, Харьков, Чернигов ва Хмелниский вилоятининг катта қисми электрдан узилди. Энергетика вазирлиги маълумотига кўра, Украинадаги барча атом электр станциялари, иссиқлик электр станциялари ва гидроэлектр станциялари ҳам қисман қувватсизланган.

Украина Қуролли кучлари Бош штаби мамлакатга Кҳ-101, Х-555 ва Калибр русумли 70 та қанотли ракета учирилгани, улардан 51 тасини Украина ҳаво ҳужумидан мудофаа тизимлари уриб туширганини маълум қилди.

«Ракета учириш Ростов вилояти ва Каспий денгизидан 10 та «Ту-95» ракета ташувчи самолётлардан, шунингдек, Қора денгиздаги иккита кичик ракета кемасидан амалга оширилди», — дейилади хабарда.

Мавзуга доир:

• Европарламент Россияни «терроризм ҳомийси» деб тан олди
• Россия Киев ва Украина вилоятларига ракета зарбалари берилди. Қурбонлар ва ярадорлар бор (видео)
• Молдова Украина энергетика тизимига берилган ракета зарбалари туфайли электрсиз қолди