Туркия армиясининг Сурия шимоли ва Ироқдаги ҳарбий амалиёти «фақат бошланиши», Анқара чегараларини ҳимоялашга қатъий қарор қилган, деди президент Ражаб Тоййиб Эрдўғон ҳукмрон партия йиғилишида.
Унинг таъкидлашича, Туркия «ўзи учун қайғуришга» ҳақли.
«Сурия ҳудудидан мамлакатимизга ҳеч қандай таҳдид бўлмайди, деганлар ўз ваъдаларини бажара олмаслиги маълум бўлди. Биз Сурия чегаралари ҳақидаги сўзимизга содиқ қолдик, аммо рақибларимиз ваъдасида туролмас экан, ўзимиз учун қайғуришга ҳақлимиз», — деди Туркия раҳбари.
Эрдўғон Туркия армияси «қулай вақт келиши билан ердаги террорчилар»га ҳужум бошлашини таъкидлади. Ҳарбийлар Тел Рифат, Манбиж ва Айн ал-Арабдан бошлайди ва «уларни тозалайди».
Шу билан бирга, Туркия раҳбари Сурия президенти Башар Асад билан учрашиш имкониятини истисно қилмади.
Ўз навбатида, Сурия ташқи ишлар вазири ўринбосари Айман Сусан Туркия ўз зарбалари билан мамлакат суверенитети ва халқаро ҳуқуқни бузганини, бу эса вазиятнинг янада кескинлашишига олиб келганини айтди.
Аввалроқ Туркия Мудофаа вазирлиги Сурия ва Ироқ шимолидаги курд тузилмаларига қарши «Панжа-қилич» ҳаво операцияси бошлангани ҳақида хабар берганди. Вазирлик маълумотларига кўра, террорчилар Туркияга ҳужум қилиш учун ушбу давлатларнинг шимолий ҳудудларидан база сифатида фойдаланмоқда.
Изоҳ (0)