Буюк Британия Олий суди Шотландиянинг мустақиллиги бўйича янги референдум ўтказилишини рад этди. Бу ҳақда Reuters хабар берди.
Британия Олий суди қарорига кўра, Шотландия ҳукумати Британия парламенти рухсатисиз 2023 йил иккинчи марта мустақиллик референдумини ўтказа олмайди. Шотландия ҳукумати агар Британиядан мустақилликка эриша олса, фунт стерлингдан воз кечишни режалаштираётгани маълум қилганди.
«Шотландия парламенти Шотландия мустақиллиги бўйича референдум ўтказиш учун қонун қабул қилиш ҳуқуқига эга эмас», — дея хулоса қилди суд раиси Роберт Рид.
Суд ҳукми ярим автоном Шотландия ҳукуматининг 2023 йил октябрь ойида Британия таркибидан чиқиш бўйича референдум ўтказиш истагига «зарба» бўлди. Шотландия бош вазири Никола Стержен Twitter’да суд қарорига муносабат билдирди.
«Буюк Британия парламентининг розилигисиз Шотландияга келажакни танлашига рухсат бермайдиган қонун Британиянинг ихтиёрий шериклик ҳақидаги ҳар қандай ғоясини афсонага айлантиради», — дейди Никола Стержен.
Унинг таъкидланишича, Олий суддаги мағлубият унинг Шотландия миллий партияси Буюк Британиядаги 2024 йилга мўлжалланган навбатдаги сайловни «де-фактў мустақиллик референдумига айлантиришини англатади.
Англия, Шотландия, Уэльс ва Шимолий Ирландияни ўз ичига олган Бирлашган Қиролликнинг 68 миллионлик умумий аҳолисининг тахминан 5,5 миллионини шотландлар ташкил қилади. 1999 йилдан бошлаб мамлакат ўз парламенти ва ҳукуматига эга.
Июнь ойида Шотландия биринчи вазири Никола Стержен мамлакат мустақиллиги бўйича янги референдум ўтказиш ниятида эканини маълум қилган. Аввал ҳам Стержен 2023 йилда яна бир мустақиллик референдумини ўтказиш нияти борлигини айтган, бироқ Британия бош вазири Борис Жонсон иккинчи референдумга йўл қўймаслигини, чунки Шотландия халқи 2014 йилдаёқ ўз истагини билдирганини бир неча бор таъкидлаган. Ўшанда ўтказилган референдумда шотландияликларнинг 55 фоизи Британия таркибида қолишни ёқлаб, 45 фоизи қарши овоз берган эди. Шотландиядаги референдум учун марказий ҳокимиятнинг розилиги талаб қилинади.
Изоҳ (0)