Киев ва Украинанинг қатор вилоятларига 23 ноябрь куни ракета зарбалари берилди. Бу ҳақда «UNIAN» хабар берди.
Маҳаллий вақт билан соат 14:00 дан кейин Украина пойтахтида кетма-кет кучли портлашлар эшитилди. Киевга учирилган ракета икки қаватли бинога зарар етказди. Ҳодиса оқибатида уч киши ҳалок бўлди, олти киши жароҳат олди. Пойтахт мери Виталий Кличко портлашларда тўққиз киши яралангани ҳақида хабар берди. Бундан ташқари, Киев вилоятида Россия ракеталари уй-жой сектори ва муҳим инфратузилма объектларига зарба бергани маълум қилинди. Киев вилоятида ярадорлар сони 20 дан ошди.
Николаев вилояти давлат маъмурияти раҳбари Виталий Ким Россия камида 9 та «Ту-95» бомбардимончи самолётини ҳавога кўтаргани ҳақида маълумот берди.
Мариупол яқинидаги авиация камида 5 та ракета учирди. Ракета зарбаси сабабли бутун Киев бўйлаб сув таъминоти тўхтатилди. Аҳолидан сув захирасини тўплаш сўралди.
Бундан ташқари, Львов вилоятидаги электр подстанциясига зарба берилди, вилоят электрдан узилди. Ракета зарбалари туфайли Украинанинг аксарият ҳудудларида электр таъминотида фавқулодда узилишлар бошланди.
«Укрэнерго» электр таъминотидаги узилишлар бир кун давом этиши мумкинлигидан огоҳлантирди. Украина ҳукумати Южноукраинская ва Ривне атом электр станциясини авария ҳолатига ўтказди. Хмелницкий вилоятидаги атом электр станцияси эса Украина энергетика тизимидан узилди.
Эслатиб ўтамиз, 15-нойбар куни Россия Украинанинг қатор вилоятларига ракета учирганди. Украина ҳаво мудофааси уларни қайтариш чоғида учирган иккита ракетаси Польшага келиб тушди. Оқибатда икки киши ҳалок бўлди. Воқеа сабабли Польша бош вазири Матеуш Моравески хавфсизлик ва мудофаа бўйича ҳукумат қўмитасининг шошилинч йиғилишини ўтказди. Ҳавога қирувчи самолётлар кўтарилди. Россия Хавфсизлик кенгаши раиси ўринбосари Дмитрий Медведев Польшада қулаган ракета билан боғлиқ воқеа Ғарб жаҳон уруши эҳтимолини ошираётганини исботлашини айтди.
Ўз навбатида, Туркия президенти Польшага тушган ракеталарнинг Россияга алоқаси йўқлигини айтди. НАТО бош котиби ҳам ракеталарнинг Украинага тегишли экани эҳтимоли юқорилигини билдирди. Аммо бунда Киев айбдор эмаслиги, Россия жавобгар эканини айтди. Польша президенти ҳам шундай фикрларни илгари сурди. Германия ва Британия эса Польшага ракета тушишига «Путин уруши» сабабчилигини таъкидлади.
Изоҳ (0)