«Дарё» интернет-нашри ҳамда Тошкент шаҳри ҳокимлиги қошидаги Жамоатчилик кенгаши ҳамкорлигида ташкил этилган «Маҳалла. Муаммо. Мулоҳаза» лойиҳасининг 2-сони меҳмони — Telegram’даги «Kurbanoff.net» канали муаллифи, иқтисодчи Шуҳрат Қурбонов бўлди. Кўрсатувнинг бу галги мавзуси — онлайн фирибгарлик.
Кўрсатув давомида студияга «Онлайн фирибгарлик юз берганда, яъни пластик карточкадаги пул ўғирланганда, кимга мурожаат қилиш керак?» деган савол келиб тушган. Иқтисодчининг жавоби шундай:
Агар картадаги пулингизни фирибгарлар ечиб оладиган бўлса, биринчи қилинадиган ҳаракат бу — картани блок қилиш. Кўп банк иловаларида шунақа имконият бор. Блок қилиш орқали картадаги қанчадир миқдордаги пул сақлаб қолиниши мумкин.Иккинчи қилинадиган иш — албатта, ҳуқуқни муҳофаза қилиш органларига мурожаат қилиш зарур. Чунки бу ерда жиноят бўлган. Улар банклардан маълумот олган ҳолда текширув ўтказиши мумкин.
Энди ҳар хил ҳолатларни кўрганман, шундан хулоса қиладиган бўлсам, максимал 4—5 дақиқангиз бор. Шу вақт ичида фирибгарлар картадан картага ўтказиб, занжир йўли билан пулни чиқариб кетишади.
Чунки кўпчилик савол беради-да, «Пул кимнинг картаси орқали чиқиб кетгани маълум-ку, нега ушлашмаяпти?» деб. Лекин аслида бошқача. Улар аввал сизнинг пластик карта кодингизни билволишади-да, қайсидир иловага улаб қўяди. Кейин меникини улаволишади. Қўлга тушган карталардан шунақа занжир қилиб, шу карталар орқали олиб чиқиб кетишади.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)