Бандлик ва меҳнат муносабатлари вазири Нозим Ҳусанов ҳамда Ўзбекистоннинг Япониядаги фавқулодда ва мухтор элчиси Муҳсинхўжа Абдураҳмонов япониялик иш берувчилар билан суҳбатлашиб, Ўзбекистоннинг меҳнат бозори ҳақида маълумот берди. Бу ҳақда «Дарё»га вазирлик ахборот хизмати раҳбари Мавжуда Мирзаева маълум қилди.
Таъкидланишича, Бандлик ва меҳнат муносабатлари вазири Нозим Ҳусанов бошчилигидаги делегация айни пайтда Япония пойтахти Токио шаҳрида бўлиб турибди.
Делегация вакиллари Токио шаҳрида дастлаб Shimizu corporation компанияси билан музокара ўтказди. Мазкур компания архитектура, қурилиш ва бош пудратчи фирма ҳисобланиб, компаниянинг йиллик савдоси тахминан 15 миллиард долларни ташкил этади. Ташкилот дунёдаги энг яхши йигирмата пудратчилардан бири сифатида тан олингани боис, компания масъулларига Ўзбекистоннинг меҳнат бозори ишчилари ҳақида маълумот берилди. Ва ишчи кучи таклиф қилинди, — дейди вазирлик ахборот хизмати раҳбари Мавжуда Мирзаева.Вазирлик ахборот хизматининг эслатишича, Ўзбекистон дунёда Японияга ишчи кучи олиб кириш имкониятига эга ўн биринчи давлатга айланган. Энди ўзбек мигрантлари Японияда ҳам меҳнат қилиб, даромад топишни бошлаган.
Таъкидланишича, куннинг иккинчи учрашуви JITCO компанияси раҳбарияти билан ўтказилган бўлиб, мулоқотда Япониядаги компанияларга хориждан, хусусан Ўзбекистондан техник стажёр ва малакали ишчиларни жалб қилиш, шунингдек, халқаро иқтисодиёт ва жамиятни ривожлантиришга қаратилган ҳаракатларда кўмак сўралган.
Қўшимча қилинишича, делегация вакиллари «Чет эллик техник стажёрлар малакасини ошириш ташкилоти» раҳбарияти билан ҳам музокара ўтказган. Унда ташкилот билан ўзбекистонлик стажёрларини ташкилотга жалб қилиш ва кунчиқар мамлакатдаги меҳнат мигрантларини ҳуқуқий, ижтимоий ҳимоялаш масалаларида режалар тузилган. Айтилишича, ташкилот техник стажёрларга билим олиш, тажриба орттириб, кўникма эгаллашда ёрдамлашиш мақсадида 2800 дан зиёд иш берувчи ассоциация ва 60 минг иш берувчи фаолиятини назорат қилади.
Аввалроқ ўзбекистонлик ишчиларнинг аксарияти ҳали япон тилини мукаммал билмаганлиги учун уларга асосан қарияларни парваришлаш ва қишлоқ хўжалигида меҳнат қилишга таклифлар бўлаётгани, давлат ҳомийлигида ўқитилаётган ишчилар келажакда бошқа иш ўринларини ҳам банд этиши кўзда тутилгани хабар берилганди.
Изоҳ (0)