«Шимолий оқим»да тўртинчи газ сизиб чиқиш ҳолати аниқланди

«Шимолий оқим» ва «Шимолий оқим 2» газ қувурларида яна бир газ сизиб чиқиш ҳолати аниқланиб, уларнинг сони 4 тага етди. Бу ҳақда Швеция Соҳил хавфсизлик хизматига таяниб, «Коммерсантъ» хабар берди.

Улардан иккитаси Швеция иқтисодий зонасида жойлашган. Швеция ҳукумати аввалроқ учта газ сизиб чиқиш ҳолати ҳақида хабар берган эди.

26 сентябрь куни «Шимолий оқим»да босим кескин пасайди. Газ сизиб чиқиш ҳодисаси учта линияда топилган. Европа ва Россия расмийларининг тахминича, бу саботаж натижасида содир бўлган.

Россия Бош прокуратураси ҳодисани «халқаро терроризм акти» деб баҳолади. Мамлакат БМТ Хавфсизлик кенгашининг фавқулодда йиғилишини чақирди.

Иккала газ қувури ҳам техник газ билан тўлдирилган. «Шимолий оқим» орқали газ етказиб бериш «Газпром» учун ускуналарга техник хизмат кўрсатиш билан боғлиқ чекловлар туфайли юзага келган қийинчиликлар туфайли сентябр ойида тўхтатилган эди. «Шимолий оқим 2» эса санкциялар туфайли ҳеч қачон ишга туширилмаган.

26 сентябрга ўтар кечаси Даниянинг Борнҳолм ороли яқинидаги эксклюзив иқтисодий зонасида «Шимолий оқим 2» газ қувурларидан бири ва «Шимолий оқим 1»нинг иккала трубкасидан газ сизиб чиққан. Швеция ва даниялик сейсмологлар ўша тунда ҳудудда портлашларни қайд этган.

Аввалроқ портлашлардан кейин «Шимолий оқим» бутунлай ишдан чиқиши мумкинлиги ҳақида хабар берилганди.

Мавзуга доир:

• «Шимолий оқим» газ қувурларига зарар етганидан кейин, халқаро терроризм ҳақида иш қўзғатилди;
• «Шимолий оқим» баёнотидан сўнг Европада газ нархи яна кескин кўтарила бошлади.